കഴക്കൂട്ടം(തിരുവനന്തപുരം): മാരക മയക്കുമരുന്നായ എം.ഡി.എം.എയുമായി എസ്.എഫ്.ഐ മുന്‍ സംസ്ഥാന നേതാവ് അടക്കം രണ്ടു പേര്‍ പൊലിസിന്റെ പിടിയിലായി. തിരുവനന്തപുരം കോര്‍പറേഷന്‍ ജീവനക്കാരനും എസ്.എഫ്.ഐ മുന്‍ സംസ്ഥാന നേതാവുമായ നെയ്യറ്റിന്‍കര ആനാവൂര്‍ ആലത്തൂര്‍ സരസ്വതി മന്ദിരത്തില്‍ ശിവപ്രസാദ്(29), കുളത്തിന്‍കര കൊതുമല ഹൗസില്‍ അജ്മല്‍(24) എന്നിവരാണ് അറസ്റ്റിലായത്. ശനിയാഴ്ച രാത്രി 10.30 ഓടെ കഠിനംകുളം തോണിക്കടവിന് സമീപത്ത് വച്ചാണ് കാറിലെത്തിയ ഇരുവരെയും പൊലിസ് പിടികൂടിയത്. പിന്‍സീറ്റിലായിരുന്ന ശിവപ്രസാദ് കാറില്‍ നിന്ന് ഇറങ്ങി ഓടി. അജ്മലിനെ പൊലിസ് പിടികൂടിയ ശേഷം നടത്തിയ പരിശോധനയിലാണ് ഷൂസിനുള്ളില്‍ നിന്ന് എം.ഡി.എം.എ പിടിച്ചെടുത്തത്. തുടര്‍ന്ന് കഠിനംകുളം ഭാഗത്ത് നിന്ന് തന്നെ ശിവപ്രസാദിനെയും പിടികൂടി.