തിരുവനന്തപുരം: 2015ലെ മികച്ച ക്ഷീരകര്‍ഷകനുള്ള മൃഗസംരക്ഷണ വകുപ്പിന്റെ അവാര്‍ഡിന് കല്‍പ്പറ്റയിലെ ചുപ്പാടിയില്‍ ഇന്റഗ്രേറ്റഡ് ഫാം നടത്തുന്ന അബ്ദുല്‍ റഷീദ് അര്‍ഹനായി. മന്ത്രി കെ. രാജു ഇന്നലെ വാര്‍ത്താസമ്മേളനത്തിലാണ് അവാര്‍ഡ് പ്രഖ്യാപിച്ചത്. പരമാവധി പാല്‍ ഉല്‍പ്പാദിപ്പിക്കുന്ന പശുക്കളെ വളര്‍ത്തുന്ന ക്ഷീരകര്‍ഷകനെയാണ് ഈ അവാര്‍ഡിന് പരിഗണിക്കുന്നത്.

മികച്ച സമ്മിശ്ര കര്‍ഷകനുള്ള അവാര്‍ഡ് തൃശൂരിലെ അഷ്ടമിച്ചിറ പഴയാറ്റില്‍ ഹൗസില്‍ സെബി പഴയാറ്റിലിനാണ്. മികച്ച കൊമേഴ്‌സ്യല്‍ ഡയറിഫാം നടത്തിപ്പിനുള്ള അവാര്‍ഡിന് കോഴിക്കോട് പുതുപ്പാടി കണ്ടണ്ടത്തുംതൊടികയില്‍ ഫിലിപ്പ് കെ.സി അര്‍ഹനായി.

മൂവര്‍ക്കും ഒരു ലക്ഷം രൂപയും പ്രശസ്തിപത്രവും ഫലകവുമാണ് പുരസ്‌കാരം. മൃഗസംരക്ഷണ മേഖലയിലെ മികച്ച വനിതാസംരംഭകയ്ക്കുള്ള അവാര്‍ഡിന് പാലക്കാട് മുതലമട ചപ്പാക്കാട് കെ.എസ്.ആര്‍ എലൈറ്റ് ഫാം നടത്തുന്ന ലളിതാ രാമകൃഷ്ണനെ തെരഞ്ഞെടുത്തു. മൃഗസംരക്ഷണ മേഖലകളില്‍ സംരംഭം നടത്തുന്ന യുവ കര്‍ഷകനുള്ള അവാര്‍ഡിന് മലപ്പുറം പലകപ്പറമ്പ് കാലടിവീട്ടില്‍ ഹൈദര്‍ നിയാസ് കെ. അര്‍ഹനായി. ഇരുവര്‍ക്കും 50,000 രൂപയും പ്രശസ്തിപത്രവും ഫലകവും അടങ്ങുന്നതാണ് അവാര്‍ഡ്. തിരുവനന്തപുരം കനകക്കുന്ന് കൊട്ടാരത്തില്‍ ഇന്നു രാവിലെ 11 മണിക്കു നടക്കുന്ന കര്‍ഷക സെമിനാറില്‍ അവാര്‍ഡുകള്‍ വിതരണം ചെയ്യുമെന്ന് മന്ത്രി അറിയിച്ചു.