യൂറോ കപ്പില്‍ ജര്‍മനിയെ കരുത്തരായ ഫ്രാന്‍സ് എതിരില്ലാത്ത ഒരു ഗോളിന് കീഴടക്കി . ജര്‍മന്‍ പ്രതിരോധതാരം മാറ്റ്‌സ് ഹമ്മല്‍സിന്റെ സെല്‍ഫ് ഗോളാണ് ഫ്രാന്‍സിന് വിജയം സമ്മാനിച്ചത്. മികച്ച താരങ്ങള്‍ അണിനിരന്ന ഫ്രാന്‍സ് ശരാശരി പ്രകടനം മാത്രമാണ് പുറത്തെടുത്തത്. കളിയുടെ ഭൂരിഭാഗം സമയം പന്ത് കൈവശം വെക്കുകയും നന്നായി കളിക്കുകയും ചെയ്തിട്ടും ഗോള്‍ നേടാന്‍ ജര്‍മനിയ്ക്ക് സാധിച്ചില്ല. 85ാം മിനിട്ടില്‍ മികച്ച മുന്നേറ്റത്തിലൂടെ കരിം ബെന്‍സേമ ജര്‍മന്‍ വല ചലിപ്പിച്ചെങ്കിലും റഫറി ഓഫ്‌സൈഡ് വിളിച്ചു. അവസാന മിനിട്ടുകളില്‍ ജര്‍മനി ഗോളടിക്കാന്‍ ആഞ്ഞുശ്രമിച്ചെങ്കിലും ഫ്രാന്‍സ് പ്രതിരോധനിരയെ മറികടക്കാന്‍ ജര്‍മനിക്കായില്ല.