ന്യൂഡല്‍ഹി: 2024 ലോക്‌സഭാ തെരഞ്ഞെടുപ്പ് മുന്നില്‍ക്കണ്ട് നിര്‍ണായക നീക്കങ്ങള്‍ക്ക് തുടക്കമിട്ട് എന്‍.സി.പി അധ്യക്ഷന്‍ ശരത് പവാര്‍.
പ്രശസ്ത തെരഞ്ഞെടുപ്പ് തന്ത്രജ്ഞന്‍ പ്രശാന്ത് കിഷോറുമായി ഇന്നലെ ചര്‍ച്ച നടത്തിയ ശേഷമാണ് പ്രതിപക്ഷ നേതാക്കളുടെയും വിവിധ മേഖലകളിലുള്ള പ്രമുഖരുടെയും യോഗം വിളിച്ചുചേര്‍ത്തത്. രണ്ടാഴ്ചയ്ക്കിടെ ഇതു രണ്ടാം തവണയാണ് പ്രശാന്ത് കിഷോര്‍ മുംബൈയിലെത്തി പവാറിനെ കാണുന്നത്. ഇന്നു വൈകിട്ട് നാലിനാണ് പ്രതിപക്ഷ നേതാക്കളുടെ യോഗം.

ലോക്‌സഭാ തെരഞ്ഞെടുപ്പിനു മുന്നോടിയായി സംയുക്ത പ്രതിപക്ഷ കൂട്ടായ്മക്കു വേണ്ടിയുള്ള നീക്കത്തിലാണ് ശരത് പവാറെന്ന് എന്‍.സി.പി വക്താവ് നവാബ് മാലിക് സ്ഥിരീകരിച്ചു. ഡല്‍ഹിയില്‍ ഇന്ന് ഉച്ചയ്ക്കു മുന്‍പായി പാര്‍ട്ടിയുടെ ദേശീയ എക്‌സിക്യുട്ടീവ് യോഗം നടക്കുന്നുണ്ടെന്നും നവാബ് മാലിക് പറഞ്ഞു. മുന്‍ ഐ.പി.എസ് ഓഫിസറും എഴുത്തുകാരനും ജെ.ഡി.യു മുന്‍ നേതാവുമായ പവന്‍ വര്‍മ, സിവില്‍ സര്‍വിസ് മുന്‍ ഉദ്യോഗസ്ഥനും മുന്‍ കേന്ദ്രമന്ത്രിയും ബി.ജെ.പി വിട്ട് തൃണമൂല്‍ കോണ്‍ഗ്രസില്‍ ചേരുകയും ചെയ്ത യശ്വന്ത് സിന്‍ഹ, ഫാറൂഖ് അബ്ദുല്ല (നാഷനല്‍ കോണ്‍ഫറന്‍സ്), സഞ്ജയ് സിങ് (എ.എ.പി), ഡി. രാജ (സി.പി.ഐ), തിരുച്ചി ശിവ (ഡി.എം.കെ), ജസ്റ്റിസ് എ.പി സിങ്, സാമൂഹിക-ചലച്ചിത്ര പ്രവര്‍ത്തകനായ ജാവേദ് അക്തര്‍, കോണ്‍ഗ്രസ് എം.പിയും മുതിര്‍ന്ന അഭിഭാഷകനുമായ കെ.ടി.എസ് തുള്‍സി, മുതിര്‍ന്ന മാധ്യമപ്രവര്‍ത്തകന്‍ കരണ്‍ താപ്പര്‍, മുതിര്‍ന്ന അഭിഭാഷകനായ എന്‍.സി.പി നേതാവ് മജീദ് മേമന്‍, ഗ്രന്ഥകാരന്‍ സുദീന്ദ്രകുല്‍ക്കര്‍ണി, മുന്‍ മുഖ്യതെരഞ്ഞെടുപ്പ് കമ്മിഷണര്‍ എസ്.വൈ ഖുറേശി, ആക്ടിവിസ്റ്റ് കോളിന്‍ ഗോണ്‍സാല്‍വസ്, സാമ്പത്തിക വിദഗ്ധന്‍ അരുണ്‍കുമാര്‍, കവിയും മാധ്യമപ്രവര്‍ത്തകനും എഴുത്തുകാരനുമായ പൃതിഷ് നന്ദി തുടങ്ങിയവരാണ് യോഗത്തില്‍ പങ്കെടുക്കുകയെന്ന് എന്‍.സി.പി വൃത്തങ്ങള്‍ അറിയിച്ചു.കപില്‍ സിബല്‍ അടക്കമുള്ളവരെ വിളിച്ചെങ്കിലും ക്ഷണം നിരസിക്കുകയായിരുന്നുവെന്നും സൂചനയുണ്ട്.