തൃശൂര്‍: അസാപ്പ് ജില്ലാ കമ്മിറ്റി യോഗം കലക്‌ട്രേറ്റില്‍ ചേര്‍ന്നു. സ്‌കൂള്‍-കോളജ് വിദ്യാര്‍ഥികള്‍ അസാപ്പിന്റെ വിദഗ്ധ പരിശീലനം നേടണമെന്ന് ജില്ലാ കമ്മിറ്റി നിര്‍ദേശിച്ചു. എ.ഡി.എം സി.കെ അനന്തകൃഷ്ണന്റെ അധ്യക്ഷതയില്‍ ചേര്‍ന്ന യോഗത്തിലാണ് നിര്‍ദേശം.
2015-16 വര്‍ഷത്തെ എ.പി.എല്‍, ജനറല്‍ വിഭാഗത്തിലെ 66 വിദ്യാര്‍ഥികള്‍ക്ക് ഫീസ് ഇളവു നല്‍കാന്‍ കമ്മിറ്റി തീരുമാനിച്ചു.
ജില്ലയില്‍ 2012 മുതല്‍ 5337 കുട്ടികള്‍ക്ക് വിവിധ വിഭാഗങ്ങളിലായി പരിശീലനം നല്‍കി കഴിഞ്ഞു. ഇതില്‍ 162 വിദ്യാര്‍ഥികള്‍ക്ക് ഉദ്യോഗവും ലഭിച്ചു. 49 ഹയര്‍സെക്കന്ററി സ്‌കൂളുകളും രണ്ട് വി.എച്ച്.എസ്.സികളും 19 കോളജുകളും അസാപ്പില്‍ രജിസ്റ്റര്‍ ചെയ്തിട്ടുണ്ട്. ജില്ലയിലെ ശേഷിക്കുന്ന സ്‌കൂളുകളും, ഹയര്‍സെക്കന്ററികളും, കോളജുകളും അസാപ്പില്‍ രജിസ്റ്റര്‍ ചെയ്യണമെന്ന് കലക്ടര്‍ അറിയിച്ചു.
യോഗത്തില്‍ കെ.യു അരുണന്‍ എം.എല്‍.എ, അസാപ്പ് ജില്ലാ പോഗ്രാം മാനേജര്‍ വി.എച്ച് നാസര്‍, അസാപ്പ് ക്വാളിറ്റി ഹെഡ് മധുസൂദനന്‍, ജില്ലാ പ്രോഗ്രാം മാനേജര്‍ ഇ.എച്ച് നാസര്‍, പ്രോഗ്രാം മാനേജര്‍മാര്‍, സ്‌കൂള്‍ കോളജ് പ്രിന്‍സിപ്പാള്‍മാര്‍ തുടങ്ങിയവര്‍ പങ്കെടുത്തു.