അല്‍ നസറില്‍ തന്റെ കളി മെച്ചപ്പെടുത്താന്‍ പുതിയ മാര്‍ഗങ്ങളുമായി റൊണാള്‍ഡോ രംഗത്ത് വരുന്നു എന്ന റിപ്പോര്‍ട്ടുകള്‍ പുറത്ത് വരുന്നുണ്ട്. പോര്‍ച്ചുഗലില്‍ നിന്നുളള 61 വയസുകാരന്‍ പരിശീലകനായ ലൂയിസ് കാസ്‌ട്രോയെ അല്‍ നസറിലേക്കെത്തിക്കാനാണ് റൊണാള്‍ഡോ ശ്രമം നടത്തുന്നത് എന്നാണ് ടി.എഫ് റിപ്പോര്‍ട്ട് ചെയ്തിരിക്കുന്നത്. നിലവില്‍ ലൂയിസ് കാസ്‌ട്രോ പരിശീലിപ്പിക്കുന്ന ബ്രസീലിയന്‍ ക്ലബ്ബായ ബൊട്ടഫോഗോയുടെ പ്രസിഡന്റായ ജോണ്‍ ടെക്‌സ്റ്ററിനെ ഉദ്ധരിച്ചാണ് ടി.എഫ് തങ്ങളുടെ റിപ്പോര്‍ട്ട് പുറത്ത് വിട്ടിരിക്കുന്നത്.
'ഇപ്പോള്‍ പുരോഗമിക്കുന്ന മത്സരങ്ങള്‍ കഴിയുന്നത് വരെ ക്ലബ്ബ് മാറുന്ന കാര്യം അദേഹത്തോട് സംസാരിക്കില്ലെന്ന് ഞാന്‍ പറഞ്ഞിട്ടുണ്ട്.

അദേഹത്തിന് ഒരു പ്രൊപ്പോസല്‍ വന്നിട്ടുണ്ട്. ലോകഫുട്‌ബോളിനെ മൊത്തം പണം കൊണ്ട് നിയന്ത്രിക്കാനുളള തയ്യാറെടുപ്പിലാണ് സഊദി. അത് വളരെ പ്രലോഭനകരമായ ഒരു അവസ്ഥയാണ്. അദേഹത്തെ സംബന്ധിച്ചിടത്തോളം ഇത് വളരെ പ്രയാസകരമായ ഒരു അവസ്ഥയാണ്. അദേഹം ക്ലബ്ബിനെ സ്‌നേഹിക്കുന്നു. അദേഹത്തിന് ക്ലബ്ബില്‍ തുടരണമെന്ന് തന്നെയാകും ആഗ്രഹം,' ജോണ്‍ ടെക്‌സ്റ്റര്‍ പറഞ്ഞു.

കഴിഞ്ഞ ട്രാന്‍സ്ഫര്‍ വിന്‍ഡോയില്‍ അല്‍ നസറിലേക്കെത്തിയ റൊണാള്‍ഡോ, രണ്ടര വര്‍ഷത്തേ കരാറിലാണ് ക്ലബ്ബിലേക്കെത്തിയിരിക്കുന്നത്. റൊണാള്‍ഡോയുമായി നല്ല ബന്ധത്തിലല്ലായിരുന്ന റൂഡി ഗാര്‍സ്യയെ ക്ലബ്ബ് പുറത്താക്കിയ ശേഷം, അണ്ടര്‍-19 പരിശീലകനായ ഡിന്‍കോ ജെലിസിച്ചാണ് സീസണിലേ ബാക്കി മത്സരങ്ങളില്‍ അല്‍ നസറിനെ പരിശീലിപ്പിച്ചിരുന്നത്.

Content highlights:Cristiano Ronaldo wants  Luis Castro to join Al-Nassr Reports