റിയാദ് • ഇന്ത്യാ രാജ്യത്തിന്റെ സ്വാതന്ത്ര്യത്തിനു വേണ്ടി ജീവന്‍ സമര്‍പ്പിച്ച ധീര ദേശാഭിമാനികളുടെ സ്മരണ പുതുക്കി സമസ്ത ഇസ്‌ലാമിക് സെന്റർ സഊദി നാഷനല്‍ കമ്മിറ്റി സംഘടിപ്പിച്ച ഫ്രീഡം സ്ക്വയര്‍ ഓൺലൈൻ സംഗമം. പാണക്കാട് സയ്യിദ് ഹമീദലി ശിഹാബ് തങ്ങള്‍ സ്വാതന്ത്ര്യദിന സന്ദേശം നല്‍കി. വൈദേശിക ശക്തികള്‍ക്കെതിരേ സന്ധിയില്ലാ സമരം നയിച്ച മഹാപണ്ഡിതരും ആത്മീയ നേതാക്കളും സ്വാതന്ത്ര്യസമര നായകരും നേടിത്തന്ന സ്വാതന്ത്ര്യവും ഭരണഘടന വിഭാവനം ചെയ്യുന്ന മൗലികാവകാശങ്ങളും നിലനിര്‍ത്താനും വര്‍ഗീയ-ഫാസിസ്റ്റ് ശക്തികള്‍ക്കെതിരേ നിലകൊള്ളുന്ന മതേതര-ജനാധിപത്യ സമൂഹത്തിന് കരുത്തുപകരാനും തയാറാകണമെന്ന് തങ്ങള്‍ പറഞ്ഞു.

നാഷനല്‍ കമ്മിറ്റി പ്രസിഡന്റ് സയ്യിദ് ഉബൈദുല്ലാ തങ്ങൾ മേലാറ്റൂർ അധ്യക്ഷനായി. വര്‍ക്കിങ് പ്രസിഡന്റ് സയ്യിദ് അബ്ദുറഹ് മാന്‍ ജമലുല്ലൈലി തങ്ങള്‍ ഉദ്ഘാടനം ചെയ്തു. ഡോ. സുബൈര്‍ ഹുദവി ചേകനൂര്‍ മുഖ്യപ്രഭാഷണം നിര്‍വഹിച്ചു. വൈസ് പ്രസിഡന്റ് ബഷീര്‍ ബാഖവി പ്രാര്‍ഥന നടത്തി. വിവിധ സംഘടനകളെ പ്രതിനിധീകരിച്ച് മന്‍സൂര്‍ പള്ളൂര്‍ (ഇന്ത്യൻ ഓവർസിസ് കോൺഗ്രസ്), അഷ്‌റഫ്‌ വെങ്ങാട് (കെ.എം.സി.സി) സംസാരിച്ചു.

നാഷനൽ കമ്മിറ്റി ഭാരവാഹികളായ, യു.കെ ഇബ്റാഹിം ഓമശ്ശേരി, സെയ്ദു ഹാജി മൂന്നിയൂര്‍ മദീന, മുഹമ്മദ്‌ റാഫി ഹുദവി, അബൂബക്കർ ദാരിമി താമരശ്ശേരി, അബ്ദുന്നാസര്‍ ദാരിമി കമ്പിൽ, റഷീദ് ദാരിമി, അബ്ദുല്‍ ബാസ്വിത് വാഫി, ഷറഫുദ്ദീന്‍ മുസ്‌ലിയാർ സംബന്ധിച്ചു. ജാബിർ നാദാപുരം ടെക്നിക്കല്‍ സപ്പോര്‍ട്ട് നല്‍കി. നാഷനല്‍ കമ്മിറ്റി സെക്രട്ടറി അബ്ദുറഹ് മാന്‍ മൗലവി അറക്കല്‍ സ്വാഗതവും ഉസ്മാൻ എടത്തിൽ നന്ദിയും പറഞ്ഞു.