ദുബൈ: ഇറാനിയന്‍ സൈന്യത്തിന്റെ നാല് വിഭാഗങ്ങളും പങ്കെടുക്കുന്ന സൈനികാഭ്യാസം ആരംഭിച്ചു. ദേശീയ ഗവണ്‍മെന്റ് വാരത്തോടനുബന്ധിച്ചാണ് പരിശീലന പരിപാടിയെന്ന് റിപ്പോര്‍ട്ടുണ്ട്.ബുധനാഴ്ച മുതല്‍ അറേബ്യന്‍ ഗള്‍ഫിലും ഒമാന്‍ സമുദ്രത്തിലും അഭ്യാസം നടത്തുമെന്ന് നേരത്തെ ഇറാന്‍ അറിയിച്ചിരുന്നു. കരസേനയും പ്രതിരോധ മന്ത്രാലയവും ചേര്‍ന്ന് നിര്‍മ്മിച്ച ഡ്രോണുകള്‍ അഭ്യാസത്തില്‍ പരീക്ഷിക്കുന്നുണ്ട്. ആയുധങ്ങളുടെ കൃത്യത, ശക്തി,നിയന്ത്രണ സംവിധാനങ്ങളുടെ കഴിവുകള്‍, ഡ്രോണുകളുടെ പോരാട്ട ശേഷി എന്നിവ ഈ അഭ്യാസത്തില്‍ വിലയിരുത്തുമെന്ന് ഇറാന്‍ ഉദ്യോഗസ്ഥര്‍ പറഞ്ഞു. ഇറാന്‍ മാധ്യമങ്ങളും ഇക്കാര്യം റിപ്പോര്‍ട്ട് ചെയ്തു. സായുധസേനയുടെ ഡെപ്യൂട്ടി കോര്‍ഡിനേറ്റര്‍ അഡ്മിറല്‍ ഹബീബുല്ല സയ്യാരിയും ഇക്കാര്യങ്ങള്‍ വ്യക്തമാക്കിയിരുന്നു. പാശ്ചാത്യ രാജ്യങ്ങളുമായുള്ള ആണവ കരാര്‍ സംബന്ധിച്ച ചര്‍ച്ചകള്‍ പുരോഗമിക്കുന്നതിനിടെയാണ് ഇറാന്‍ സൈനികാഭ്യാസം.ഇറാനെ ആണവായുധം സ്വന്തമാക്കാന്‍ അനുവദിക്കില്ലെന്ന് ഇസ്രായേല്‍ പ്രധാനമന്ത്രി പ്രഖ്യാപിച്ചിരുന്നു. ഇതിന് പിന്നാലെയാണ് ഇറാന്‍ സൈനികാഭ്യാസം പ്രഖ്യാപിച്ചത്. അഭ്യാസം രണ്ടു ദിനം തുടരുമെന്നാണ് ഇറാന്‍ ഔദ്യോഗിക വാര്‍ത്താ ഏജന്‍സി ഇര്‍ന റിപ്പോര്‍ട്ട് ചെയ്തത്.