സൈനുൽ ആബിദ് സഫാരി

സാമൂഹിക, വൈയക്തിക ജീവിതത്തിൽ സൂക്ഷ്മത പുലർത്തിയ പണ്ഡിത പ്രതിഭയാണ് വിടപറഞ്ഞ ചേലക്കാട് മുഹമ്മദ് മുസ് ലിയാർ. കേരളത്തിലെ ഉന്നത പണ്ഡിതന്മാരിൽനിന്ന് ജ്ഞാനം കരസ്ഥമാക്കിയ അദ്ദേഹം പിന്നെ അറിവിന്റെ നീരൊഴുക്കായി മാറുകയായിരുന്നു. പ്രാർഥനകൾകൊണ്ട് ജീവിതപ്രതിസന്ധികളെ മാറ്റിനിർത്തിയ ചേലക്കാട് മുഹമ്മദ് മുസ് ലിയാരുമായി പറഞ്ഞറിയിക്കാനാകാത്തത്ര അടുപ്പമുണ്ടായിരുന്നു. അത്രമേൽ രൂഢമൂലമായിരുന്നു ആ ബന്ധം. ഭൗതികതയോട് ഭ്രമമില്ലാതെ, ആൾക്കൂട്ടങ്ങളിൽ നിന്നകന്ന്, തർക്കവിതർക്കങ്ങളിൽ നിന്നൊഴിഞ്ഞ് അദ്ദേഹം തനിയെ ജീവിച്ചു. പണ്ഡിതദൗത്യം കൃത്യമായി, ആരോപണങ്ങളില്ലാതെ വ്യക്തമായി നിർവഹിച്ചു.

എന്റെ ജീവിതത്തിലെ ഏറ്റവും വലിയ സൗഭാഗ്യം ഉസ്താദിന്റെ സാമീപ്യം തന്നെയായിരുന്നു. കുടുംബത്തിനും എല്ലാമായിരുന്നു. മാതാവ് പരലോകം പ്രാപിക്കുന്ന സമയത്ത് കൂടെനിന്നു. ആ സമയത്തു നൽകിയ ആത്മധൈര്യം ചെറുതൊന്നുമായിരുന്നില്ല. അവിടുത്തെ പ്രാർഥനകൾ ആത്മവിശ്വാസത്തിന്റെ വാതിലുകൾ തുറന്നുതന്നു. ബിസിനസ്, സാമൂഹ്യ പ്രവർത്തനമേഖലകളിലെ പല പ്രതിസന്ധികളും അയത്‌നലളിതമായി പരിഹരിച്ചു അദ്ദേഹം, നിർദേശങ്ങളിലൂടെയും ഉപദേശങ്ങളിലൂടെയും എന്നും കൂടെനിന്നു.

സാമൂഹ്യ-വൈയക്തിക പ്രശ്‌നങ്ങളിൽ പരിഹാരം കണ്ടെത്തുമ്പോൾ അദ്ദേഹം തികഞ്ഞ ജ്ഞാനിയായി. സാഹചര്യങ്ങൾക്കനുസൃതമായി സംസാരിച്ചു. ഇരുവിഭാഗങ്ങളെയും പ്രശ്‌നത്തിന്റെ മർമം കൃത്യമായി മനസിലാക്കികൊടുത്തു. ആർക്കും പരാതിയോ പരിഭവമോ ഇല്ലാത്തവിധം പ്രതിവിധിയുടെ ലളിതവാക്യങ്ങൾ ചൊല്ലി. അവിടെ തീരുകയായിരുന്നു ഓരോ പ്രശ്‌നവും. വേദനകളും വിഷമങ്ങളുമായി ഉസ്താദിന്റെ മജ്‌ലിസുകളിലെത്തി ഭക്തിനിർഭരമായ പ്രാർഥനകളിൽ പങ്കെടുത്താൽ തന്നെ പ്രശ്‌നങ്ങൾ മഞ്ഞുപോലെ ഉരുകിപ്പോയ അനുഭവങ്ങൾ നിരവധിയാണ്.
(സുപ്രഭാതം വൈസ് ചെയർമാനാണ് ലേഖകൻ )