ബാസിത് ഹസൻ
തൊടുപുഴ • കൊവിഡും സമ്മർദവും ആരോഗ്യം കെടുത്തിയെന്ന വിലയിരുത്തലിന്റെ അടിസ്ഥാനത്തിൽ ജീവനക്കാർക്ക് വൈദ്യപരിശോധനയുമായി കെ.എസ്.ഇ.ബി. 14 ജില്ലകളിലെയും ജീവനക്കാർക്കും ചെറുകിട കോൺട്രാക്ടർമാർക്കുമായി പ്രത്യേകം വൈദ്യപരിശോധനാ ക്യാംപുകൾ സംഘടിപ്പിക്കാനാണ് പദ്ധതി.
കൊവിഡിനുശേഷം വിവിധ ആരോഗ്യപ്രശ്‌നങ്ങളും സമ്മർദവും മൂലം ജോലിസമയത്തെ അപകടങ്ങൾ വർധിച്ചുവരികയാണ്.
2022 ജനുവരി ഒന്നു മുതൽ ജൂലൈ 31 വരെ മാത്രം 74 അപകടങ്ങൾ ഉണ്ടാകുകയും 8 പേർ മരണപ്പെടുകയും ചെയ്തിട്ടുണ്ട്. ഈ സാഹചര്യത്തിലാണ് വൈദ്യപരിശോധന നടത്തി ആരോഗ്യപ്രശ്‌നങ്ങളുള്ളവരെ കണ്ടെത്താൻ ബോർഡ് തീരുമാനിച്ചത്.
കെ.എസ്.ഇ.ബി ഡയരക്ടർ (റിന്യൂവബിൾ എനർജി ആൻഡ് എനർജി സേവിങ്‌സ്) ആർ. സുകുവിനാണ് പദ്ധതിയുടെ മേൽനോട്ടച്ചുമതല. ആസൂത്രണ ചുമതല ചീഫ് പേഴ്‌സണൽ ഓഫിസർക്കാണ്.
ആദ്യപടിയായി തിരുവനന്തപുരത്തെ വൈദ്യുതി ഭവനിലും പത്തനംതിട്ട, പാലക്കാട്, കണ്ണൂർ ജില്ലാ ആസ്ഥാനങ്ങളിലുമാണ് ക്യാംപ് സംഘടിപ്പിക്കുന്നത്. സംസ്ഥാനതല ഉദ്ഘാടനം തിരുവനന്തപുരത്തോ പാലക്കാട്ടോ നടത്താനാണ് തീരുമാനം.
പിന്നീട് ഡിവിഷൻതലത്തിലും സെക്ഷൻതലത്തിലും ക്യാംപ് സംഘടിപ്പിക്കും. പരിശോധനയ്ക്ക് വിധേയമാകാൻ താൽപര്യമുള്ളവർ മാത്രമേ ക്യാംപിൽ പങ്കെടുക്കേണ്ടതുള്ളൂ. ആരെയും നിർബന്ധപൂർവം പങ്കെടുപ്പിക്കില്ല.
സംസ്ഥാന ആരോഗ്യവകുപ്പിന്റെയും റീജ്യണൽ കാൻസർ സെന്ററിന്റെയും സഹകരണത്തോടെയാണ് മെഡിക്കൽ ക്യാംപുകൾ സംഘടിപ്പിക്കുന്നത്.
200 ജീവനക്കാരെ വീതമാണ് ഓരോ ക്യാംപിലും പങ്കെടുപ്പിക്കുക. പദ്ധതി തുടർവർഷങ്ങളിൽ മുടങ്ങാതെ നടത്തണമെന്നും നിർദേശമുണ്ട്.
വൈദ്യുതി ബോർഡ് ജീവനക്കാർക്കുള്ള ക്ഷേമപദ്ധതികളിൽപ്പെടുത്തിയാണ് വൈദ്യപരിശോധന സംഘടിപ്പിക്കുന്നത്.