കൊച്ചി: വളര്‍ത്തുനായയെ ക്രൂരമായി തല്ലിക്കൊന്ന സംഭവത്തില്‍ എത്രയുംവേഗം കുറ്റപത്രം സമര്‍പ്പിക്കണമെന്ന് ഹൈക്കോടതി. തിരുവനന്തപുരം അടിമലത്തുറയിലാണ് വളര്‍ത്തുനായയെ ചൂണ്ടയില്‍ കുരുക്കി മൂന്നുപേര്‍ ചേര്‍ന്ന് തല്ലിക്കൊന്നത്. സംഭവത്തില്‍ ഹൈക്കോടതി സ്വമേധയാ കേസെടുത്തിരുന്നു.

സംസ്ഥാന സര്‍ക്കാരിനോട് ഇക്കാര്യത്തില്‍ വിശദീകരണം തേടിയ ഹൈക്കോടതി പത്ത് ദിവസത്തിനകം സ്വീകരിച്ച നടപടികള്‍ എന്തെല്ലാമെന്ന് വ്യക്തമാക്കാനും ആവശ്യപ്പെട്ടു. കേസില്‍ മൂന്ന് പേരെ അറസ്റ്റ് ചെയ്തതായി അഡ്വക്കറ്റ് ജനറല്‍ ഇന്ന് ഹൈക്കോടതിയില്‍ അറിയിച്ചു.

സംഭവത്തില്‍ അനിമല്‍ വെയര്‍ഫെയര്‍ ബോര്‍ഡിനോട് വിശദീകരണം നല്‍കണമെന്നും ഹൈക്കോടതി ആവശ്യപ്പെട്ടു. മൃഗാശുപത്രികളിലെ നിലവിലെ സൗകര്യങ്ങള്‍ ഹൈക്കോടതിയെ ബോര്‍ഡ് അറിയിക്കണം. തെരുവില്‍ അലയുന്ന മൃഗങ്ങളുടെ സംരക്ഷണം പ്രധാനമാണെന്നും കോടതി ചൂണ്ടിക്കാട്ടി.