തിരുവനന്തപുരം • ഹർത്താൽ ദിനത്തിൽ വാഹനങ്ങൾക്കു നേരെ കല്ലേറ് പതിവുള്ളതാണ്. ഉന്നംതെറ്റാതെ കൊള്ളുന്ന ഓരോ കല്ലുകളും തകർക്കുന്നത് സാധാരണക്കാരന്റെ നെഞ്ചാണ്.
തകരുന്ന ചില്ലുകളും തല്ലിത്തകർക്കുന്ന വാഹനങ്ങളും നോക്കി പ്രതിഷേധത്തിന്റെ ശക്തിയും ഹർത്താലിന്റെ വിജയവും കണക്കാക്കുന്ന രീതി തുടങ്ങിയിട്ട് കാലം കുറേയായി.
സമരക്കാർ എറിഞ്ഞുടയ്ക്കുന്ന ചില്ലുകൾ (വിൻഡ് ഷീൽഡുകൾ) മാറ്റാൻ വലിയ തുകയാണ് കെ.എസ്.ആർ.ടി.സി മുടക്കേണ്ടി വരുന്നത്. സാധാരണ ബസുകളിൽ നിന്ന് വ്യത്യസ്തമായി നീളം കുറഞ്ഞ ഓർഡിനറി കട്ട് ചെയ്‌സ് ബസുകളുടെ ചില്ലിന് 11,000 രൂപയാണ് വില. ഫാസ്റ്റ് പാസഞ്ചർ, സൂപ്പർ ഫാസ്റ്റ് ബസുകൾക്കാകട്ടെ ശരാശരി 13,000 രൂപ. ലോഫ്‌ളോർ,വോൾവോ തുടങ്ങി മൾട്ടി ആക്‌സിൽ ബസുകളുടെ ഗ്ലാസുകൾ തകർന്നാൽ 16,000 മുതൽ 18,000 രൂപ വരെയാകും. കേടുപാട് സംഭവിക്കുന്ന വാഹനത്തിന്റെ ബോഡി ഉൾപ്പെടെ ഭാഗങ്ങൾക്കുള്ള ചെലവുവേറെ.
ജീവിതത്തിന്റെ രണ്ടറ്റം കൂട്ടിമുട്ടിക്കാൻ നെട്ടോട്ടമോടുന്ന ഓട്ടോ-ടാക്‌സി തൊഴിലാളികളും അക്രമത്തിൽ വലയുന്നുണ്ട്. സമരക്കാർ തകർക്കുന്ന ഓട്ടോറിക്ഷയുടെ ചില്ലുകൾ മാറാൻ 4,000 രൂപ ചെലവാകും. സീലെന്റ്, മോൾഡിങ്ങ് എന്നിവ ഉൾപ്പെടെ 6,500 രൂപ വരെ വിലവരും കാർ ഗ്ലാസുകൾക്ക്. ടെമ്പോ ട്രാവലറുകളുടേതിനും മിനി ലോറികളുടേതിനും 6, 000 മുതൽ 8000 രൂപയാകും.
ഗ്ലാസുകൾ പൊട്ടിയാൽ ഇൻഷുറൻസ് കമ്പനിക്കാർ പണം നൽകില്ല. സ്വന്തം ചെലവിൽ മാറ്റണം.