ഇ.പി മുഹമ്മദ്

കോഴിക്കോട് • ചിരിക്കുന്ന കമ്യൂണിസ്റ്റുകാരൻ. അതായിരുന്നു കോടിയേരി ബാലകൃഷ്ണൻ. കടുപ്പക്കാരനും കർക്കശക്കാരനുമായ പാർട്ടി നേതാവ് ആയിരിക്കുമ്പോഴും ഉള്ളുനിറഞ്ഞ ചിരി അദ്ദേഹത്തെ മറ്റുകമ്യൂണിറ്റ് നേതാക്കളിൽനിന്ന് വേറിട്ടു നിർത്തി.വിദ്യാർഥി പ്രസ്ഥാനത്തിലൂടെ കടന്നുവന്ന് സി.പി.എമ്മിന്റെ പരമോന്നത സമിതിയായ പൊളിറ്റ് ബ്യൂറോ അംഗമായപ്പോഴും പാർട്ടി സെക്രട്ടറിയും ആഭ്യന്തര മന്ത്രിയും ആയി സംസ്ഥാന രാഷ്ട്രീയത്തിൽ നിറഞ്ഞുനിന്നപ്പോഴും ചിരിക്കുന്ന മുഖവുമായാണ് കോടിയേരിയെ ജനം കണ്ടത്. പാർട്ടി യോഗങ്ങളിലും വാർത്താസമ്മേളനങ്ങളിലും ചിലപ്പോഴൊക്കെ ഗൗരവക്കാരനാകുമെങ്കിലും സ്ഥായീഭാവം ഏവരെയും ആകർഷിക്കുന്ന ചിരിയായിരുന്നു. സൗഹൃദ സംഭാഷണങ്ങളിൽ അൽപം തമാശ കലർത്തൽ അദ്ദേഹത്തിന്റെ സവിശേഷതയായിരുന്നു.കടുപ്പക്കാരനായ കമ്യൂണിസ്റ്റ് എന്ന സംഘടനാമുഖവും സൗമ്യനായ, ചിരിക്കുന്ന സഖാവ് എന്ന സൗഹൃദ ഭാവവും മാറിമാറി അണിയുന്നതിൽ കോടിയേരി എന്നും വിജയിച്ചിരുന്നു.

രാഷ്ട്രീയ എതിരാളികൾക്കു പോലും സ്വീകാര്യമായ നയതന്ത്രം കോടിയേരിക്ക് കേരള രാഷ്ട്രീയത്തിലും സി.പി.എമ്മിലും സ്ഥാനം നൽകി. പ്രതിസന്ധി ഘട്ടത്തിലെല്ലാം പ്രസന്നഭാവം കൂടെക്കൊണ്ടുനടന്നു.
സമാനതകളില്ലാത്ത സംഘാടന വൈഭവമാണ് കോടിയേരിയുടെ മുതൽക്കൂട്ട്. ഏത് പ്രതിസന്ധിയും മറികടക്കാൻ കോടിയേരിയെന്ന പ്രായോഗികമതിക്ക് സാധിച്ചു. പ്രായോഗിക രാഷ്ട്രീയം മാർക്‌സിയൻ ദർശനത്തിലൂന്നി നടപ്പിലാക്കുന്ന രീതി അദ്ദേഹത്തെ വ്യത്യസ്തനും ജനകീയനുമാക്കി.

2006ൽ സി.പി.എമ്മിൽ വിഭാഗീയത കൊടികുത്തി വാണപ്പോൾ മധ്യസ്ഥന്റെ സ്ഥാനമായിരുന്നു അന്ന് ആഭ്യന്തര മന്ത്രിയായിരുന്ന കോടിയേരിക്ക്.