ന്യൂഡല്‍ഹി: കോണ്‍ഗ്രസ് പ്രസിഡന്റ് തെരഞ്ഞെടുപ്പില്‍ മല്‍സരിക്കുന്ന സ്ഥാനാര്‍ത്ഥികളുടെ പട്ടിക ഇന്ന് പ്രസിദ്ധീകരിക്കും. നാമനിര്‍ദേശ പത്രിക പിന്‍വലിക്കാനുള്ള സമയം ഇന്ന് അവസാനിക്കുന്നതോടെ തെരഞ്ഞെടുപ്പ് സമിതി അന്തിമ സ്ഥാനാര്‍ത്ഥി പട്ടിക പുറത്തുവിടും. വൈകീട്ട് മൂന്നു വരെയാണ് പത്രിക പിന്‍വലിക്കാനുള്ള സമയം.

മല്‍സരരംഗത്തുള്ള ശശി തരൂര്‍ എം.പിയും മല്ലുകാര്‍ജുന്‍ ഖാര്‍ഗെയും തെരഞ്ഞെടുപ്പ് പ്രചാരണരംഗത്ത് സജീവമാണ്. ഇന്നും നാളെയും മുംബൈയിലാണ് തരൂരിന്റെ പ്രചാരണം. ദേശീയ നേതൃത്വത്തിന്റെ പിന്തുണയുള്ള ഖാര്‍ഗെയുടെ അടുത്ത പ്രചാരണം ഗുജറാത്തിലാണ്.

ശശി തരൂര്‍ പിന്മാറില്ലെന്ന് പ്രഖ്യാപിച്ചതിനാല്‍ തെരഞ്ഞെടുപ്പ് ഉറപ്പാണ്. ഒക്ടോബര്‍ 17നാണ് വോട്ടെടുപ്പ്. 9000ത്തിലധികം പി.സി.സി അംഗങ്ങള്‍ക്കാണ് വോട്ടവകാശം. ഒക്‌ടോബര്‍ 19ന് വോട്ടെണ്ണി അന്നുതന്നെ ഫലം പ്രഖ്യാപിക്കും.