പുതുനഗരം: ആളില്ലാത്ത ലെവല്‍ ക്രോസിങ്ങുകള്‍ക്ക് ഗേറ്റ് സ്ഥാപിക്കണമെന്ന ആവശ്യം ശക്തമാകുന്നു. പാലക്കാട് - പുതുനഗരം ലൈനുകള്‍ക്കിടയില്‍ പുതുനഗരം മുതല്‍ മീനാക്ഷിപുരം വരെയുള്ള 12 ആളില്ലാത്ത ലെവല്‍ ക്രോസിങ്ങുകളാണ്. നിലവില്‍ അപകടങ്ങള്‍ വര്‍ധിച്ചിരിക്കുന്നത്.
വാഹനങ്ങള്‍ കൂടുതലായി കടന്നുപോകുന്ന പ്രദേശങ്ങളിലുള്ള ആളില്ലാത്ത ലെവല്‍ ക്രോസിങ്ങുകള്‍ സ്‌ക്കൂള്‍ വാഹനങ്ങള്‍ക്കും നാട്ടുകാര്‍ക്കും പ്രയാസമുണ്ടാക്കിയിരിക്കുകയാണ്. ആളില്ലാത്ത ലെവല്‍ക്രോസിങ്ങുകളില്‍ താല്‍ക്കാലികമായി നീരീക്ഷകരെ നിയമിച്ചിട്ടുണ്ടെങ്കിലും മിക്കപ്പോഴും ഇവര്‍ ട്രെയിന്‍ വരുന്ന സമയങ്ങളില്‍ ഉണ്ടാകാറില്ലെന്ന് നാട്ടുകാര്‍ പറയുന്നു.
ട്രെയിന്‍ വരുന്ന സമയങ്ങളില്‍ വിസിലടിച്ച് നാട്ടുകാരെ അറിയിക്കും. താല്‍ക്കാലികമായി ജോലിയെടുക്കുന്ന ഇവരുടെ സമയക്രമം പകല്‍ മാത്രമായതിനാല്‍ രാത്രികളില്‍ ട്രെയ്ന്‍ വരുമ്പോള്‍ വാഹനങ്ങള്‍ക്ക് അറിയാത്ത അവസ്ഥയുമുണ്ട്. ആളില്ലാത്ത ലെവല്‍ ക്രോസിങ്ങുകളില്‍ റെയില്‍വേ ഗേറ്റ് സ്ഥാപിച്ച് അപകടങ്ങള്‍ ഇല്ലാതാക്കുവാന്‍ നടപടിയെടുക്കണമെന്നാണ് നാട്ടുകാരുടെ ആവശ്യം.