ദുബായ്: സ്വരമാധുരിയും ആലാപനത്തിലെ വ്യതിരിക്തതയും കൊണ്ട് മാപ്പിളപ്പാട്ട് ലോകത്ത് തന്റേതായ ഇടം കണ്ടെത്തിയ പാട്ടുകാരിയായിരുന്നു അന്തരിച്ച റംലാ ബീഗമെന്ന് ദുബായില്‍ സംഘടിപ്പിച്ച അനുസ്മരണ യോഗം അഭിപ്രായപ്പെട്ടു. അവിസ്മരണീയമായ പ്രകടനങ്ങളിലൂടെ മാപ്പിളപ്പാട്ടിനും ഇസ്‌ലാമിക കഥാപ്രസംഗത്തിനും വേറിട്ട ശബ്ദമധുരിമ അവര്‍ പകര്‍ന്നു നല്‍കി. ഷംസുദ്ദീന്‍ നെല്ലറയുടെ നേതൃത്വത്തിലുള്ള പാട്ടാസ്വാദകരാണ് അനുസ്മരണ യോഗം സംഘടിപ്പിച്ചത്. ഷംസുദീന്‍ നെല്ലറ, ഗായകന്‍ യൂസുഫ് കാരക്കാട്, ഷമീര്‍ ശര്‍വാനി, അസീസ് മണമ്മല്‍, ഹക്കീം വാഴക്കാല, വി.സി സൈതലവി, ജബ്ബാര്‍ മൂച്ചിക്കല്‍, ഫിറോസ് പയ്യോളി തുടങ്ങിയവര്‍ സംസാരിച്ചു. റംലാ ബീഗത്തിന്റെ പ്രധാന ഗാനങ്ങള്‍ ഗായകന്‍ യൂസുഫ് കാരക്കാട് ചടങ്ങില്‍ ആലപിച്ചു.