തൊടുപുഴ: കോതമംഗലത്ത് മാനസയെ വെടിവച്ച് കൊന്ന രഖിലിന് തോക്ക് നല്‍കിയയാളെ ബിഹാറില്‍ നിന്ന് പൊലിസ് പിടികൂടി. ബിഹാര്‍ മുനഗര്‍ സ്വദേശി സോനുകുമാര്‍ മോദിയാണ് അറസ്റ്റിലായത്.

ബിഹാര്‍ പൊലിസിന്റെ സഹായത്തോടെ കോതമംഗലം എസ്‌ഐ മാഹിനിന്റെ നേതൃത്വത്തില്‍ മൂന്ന് പൊലിസുകാര്‍ ഉള്‍പ്പെട്ട സംഘമാണ് ബിഹാറിലെത്തി ഇയാളെ അറസ്റ്റ് ചെയ്തത്.

പൊലിസിനെ ആക്രമിച്ച് രക്ഷപ്പെടാന്‍ സോനുവും സംഘവും ശ്രമിച്ചെങ്കിലും പൊലിസ് വെടിയുതിര്‍ത്തതോടെ ഇവര്‍ കീഴടങ്ങി.

പ്രതിയെ മുന്‍ഗര്‍ കോടതിയില്‍ ഹാജരാക്കി കോതമംഗലത്തേക്ക് ട്രാന്‍സിസ്റ്റ് വാറന്റ് വാങ്ങി. തുടര്‍ന്ന് ഇയാളുമായി പൊലിസ് സംഘം കേരളത്തിലേക്ക് തിരിച്ചു.

രഖിലിനെ സോനുവിലേക്ക് എത്തിച്ച ഊബര്‍ ടാക്‌സി ഡ്രൈവറെ കേരള പൊലിസ് തിരയുന്നുണ്ട്. പട്‌നയില്‍ നിന്നും ഇയാളുടെ സഹായത്തോടെയാണ് രഖില്‍ മുനഗറില്‍ എത്തിയതെന്നാണ് സൂചന.