സ്വന്തം ലേഖകന്‍
പാലക്കാട്: കുടുംബ തര്‍ക്കവുമായി ബന്ധപ്പെട്ട പരാതിയില്‍ പ്രതികളെ അറസ്റ്റു ചെയ്യാനെത്തി ആദിവാസി ഊരില്‍ ഭീകരാന്തരീക്ഷം സൃഷ്ടിച്ച് പൊലിസ്. ഷോളയൂര്‍ വട്ടലക്കി ഊരുമൂപ്പന്‍ ചൊറിയന്‍ മൂപ്പനെയും മകന്‍ മുരുകനെയും അറസ്റ്റ് ചെയ്യാനെത്തിയപ്പോഴാണ് ഷോളയൂര്‍ പൊലിസിന്റെ അതിക്രമം. പഠന വൈകല്യമുള്ള പതിനേഴുകാരനായ മുരുകന്റെ മകന്‍ വിജീഷിന്റെ മുഖത്ത് പൊലിസ് മര്‍ദിക്കുന്നതിന്റെയും സ്ത്രീകളടക്കമുള്ളവരെ കൈയേറ്റം ചെയ്യുന്നതിന്റെയും ദൃശ്യങ്ങളാണ് പുറത്തുവന്നിരിക്കുന്നത്. സി.ഐ വിജീഷിനെ മര്‍ദിക്കുന്നതും പൊലിസുകാര്‍ സ്ത്രീകളെ ഉള്‍പ്പെടെയുളളവര്‍ക്ക് നേരെ ബലപ്രയോഗം നടത്തുന്നതും ദൃശ്യങ്ങളില്‍ കാണാം.
കന്നുകാലികളെ മേയ്ക്കാന്‍ കൊണ്ടുപോകുന്നതുമായി ബന്ധപ്പെട്ട തര്‍ക്കം മാത്രമാണ് പ്രദേശത്തുണ്ടായിരുന്നുള്ളു. ആദിവാസികളുടെ പ്രശ്‌നങ്ങളുമായി ബന്ധപ്പെട്ട് പ്രവര്‍ത്തിക്കുന്ന പ്രാദേശിക നേതാവായ മുരുകന്‍ എപ്പോള്‍ വിളിച്ചാലും സ്റ്റേഷനില്‍ എത്തുന്നയാളായിരുന്നിട്ടുപോലും പൊലിസ് ഊരിലെത്തി ഭീകരാന്തരീക്ഷം സൃഷ്ടിക്കുകയായിരുന്നു.
കൃഷിസ്ഥലത്ത് കന്നുകാലികളെ മേയാന്‍ വിട്ടതുമായി ബന്ധപ്പെട്ട തര്‍ക്കത്തില്‍ അയല്‍വാസിയായ കുറുന്താചലത്തെ മൂപ്പനും മുരുകനും മര്‍ദിച്ചിരുന്നു. ഇവരിപ്പോള്‍ ചികിത്സയിലാണ്. പരാതിയെ തുടര്‍ന്ന് പലതവണ ആവശ്യപ്പെട്ടിട്ടും സ്റ്റേഷനില്‍ ഹാജരാവാതിരുന്ന പ്രതികളെ പിടികൂടാനാണ് ഊരിലെത്തിയതെന്നും എന്നാല്‍ ഊരിലുള്ളവര്‍ കൃത്യനിര്‍വഹണം തടസപ്പെടുത്താന്‍ ശ്രമിക്കുകയായിരുന്നുവെന്നാണ് പൊലിസിന്റെ വിശദീകരണം. സംഭവത്തില്‍ പ്രതിഷേധിച്ച് ആദിവാസി ആക്ഷന്‍ കൗണ്‍സില്‍ ഷോളയൂര്‍ പൊലിസ് സ്റ്റേഷന്റെ മുന്‍പിലും അഗളി എ.എസ്.പി ഓഫിസിനു മുന്‍പിലും പ്രതിഷേധിച്ചു.