മുഖ്യമന്ത്രിയുടെ വാഹനവ്യൂഹത്തിന് തടസമുണ്ടാക്കിയെന്ന് ആരോപണം; കസ്റ്റഡിയിലെടുത്ത വിദ്യാര്‍ഥികളെ വിട്ടയച്ചു

തിരുവനന്തപുരം: മുഖ്യമന്ത്രിയുടെ വാഹനത്തിന് മാര്‍ഗ തടസം സൃഷ്ടിച്ചുവെന്ന് ആരോപിച്ച് പൊലിസ് കസ്റ്റഡിയിലെടുത്ത വിദ്യാര്‍ഥികളെ വിട്ടയച്ചു. കേള്‍വി പരിമിതിയുള്ളതും സംസാരശേഷിയില്ലാത്തവരുമായ അഞ്ച് യുവാക്കളെയാണ് പൊലിസ് കസ്റ്റഡിയിലെടുത്തത്. വാഹന വ്യൂഹം ഹോണ്‍ മുഴക്കിയിട്ടും വഴിമാറാത്തതിനെ തുടര്‍ന്നാണ് ചടയമംഗലം പൊലിസ് ഇവരെ കസ്റ്റഡിയിലെടുത്തത്.

കേള്‍വിപരിമിധിയുള്ള സംസാര ശേഷിയില്ലാത്തവരാണ് വിദ്യാര്‍ഥികള്‍. തിരുവനന്തപുരം ആക്കുളം നിഷിലെ വിദ്യാര്‍ഥികളാണ് ഇവര്‍ അഞ്ചുപേരും.

വിദ്യാര്‍ഥികള്‍ ഹോട്ടലില്‍ നിന്നും ഭക്ഷണം കഴിച്ച് വാഹനം എടുക്കുന്നതിനിടയിലാണ് മുഖ്യമന്ത്രിയുടെ വാഹനവ്യൂഹം എത്തിയത്. വാഹനവ്യൂഹം അടുത്തെത്തി ഹോണടിച്ചിട്ടും ഇവര്‍ മാറിയില്ലെന്ന് ആരോപിച്ചായിരുന്നു അഞ്ച് പേരെയും കസ്റ്റഡിയിലെടുത്തത്.