കോഴിക്കോട്: താലിബാനെതിരായി ഫേസ്ബുക്കില്‍ പോസ്റ്റിട്ടതിന് എം.കെ മുനീര്‍ എം.എല്‍.എക്ക് വധഭീഷണി. 24 മണിക്കൂറിനുള്ളില്‍ പോസ്റ്റ് പിന്‍വലിച്ചില്ലെങ്കില്‍ കുടുംബത്തെയടക്കം 'തീര്‍പ്പ് കല്‍പ്പിക്കു'മെന്ന് ഭീഷണിപ്പെടുത്തുന്ന കത്ത് ഇന്നലെ രാവിലെയാണ് മുനീറിന് ലഭിച്ചത്. താലിബാനെതിരായ പോസ്റ്റില്‍ പറയുന്നത് മുസ്‌ലിം വിരുദ്ധതയാണെന്നും ജോസഫ് മാഷാകാന്‍ ശ്രമിക്കരുതെന്നും ജോസഫ് മാഷിന്റെ അവസ്ഥയുണ്ടാക്കരുതെന്നും കത്തില്‍ പറയുന്നു. 

 

'താലിബാന്‍ ഒരു വിസ്മയം' എന്ന പേരിലാണ് കത്ത് വന്നതെന്നും പൊലിസ് മേധാവിക്ക് കത്തിന്റെ പകര്‍പ്പ് സഹിതം പരാതി നല്‍കിയെന്നും എം.കെ മുനീര്‍ മാധ്യമങ്ങളോട് പറഞ്ഞു. മെഡിക്കല്‍ കോളജ് പോസ്റ്റ്ഓഫിസ് പരിധിയിലെ തപാല്‍പെട്ടിയില്‍ പോസ്റ്റ് ചെയ്തതാണ് കത്തെന്ന് വ്യക്തമായിട്ടുണ്ട്. അഫ്ഗാന്‍ ഭരണം താലിബാന്‍ പിടിച്ചതിനു പിന്നാലെ അതിനെ എതിര്‍ത്തും മുനീര്‍ ഫേസ്ബുക്ക് പോസ്റ്റ് ഇട്ടിരുന്നു. മനുഷ്യാവകാശങ്ങള്‍ മാനിക്കാത്ത വിവേചനത്തിന്റെയും തീവ്ര മതമൗലികവാദത്തിന്റെയും അപരവല്‍ക്കരണത്തിന്റെയും പ്രതിലോമ രാഷ്ട്രീയമാണ് താലിബാനെന്നും മുനീര്‍ പറഞ്ഞിരുന്നു.