കാഞ്ഞങ്ങാട്: ദമ്പതികളെ വാടകവീട്ടില്‍ വിഷം കഴിച്ച നിലയില്‍ കണ്ടെത്തി. ആശുപത്രിയിലേക്ക് പോകുംവഴി ഭാര്യ മരിച്ചു. ഭര്‍ത്താവ് ചികിത്സയില്‍. വയനാട് പനമരം സ്വദേശിനി രമ(44) ആണ് മരിച്ചത്. ഭര്‍ത്താവ് ജയപ്രകാശ് നാരായണന്‍(45) കണ്ണൂര്‍ ഗവ.മെഡിക്കല്‍ കോളജ് ആശുപത്രിയില്‍ ഗുരുതരാവസ്ഥയിലാണ്.

കാഞ്ഞങ്ങാട് റെയില്‍വേ സ്റ്റേഷനു സമീപം കൊവ്വല്‍ എ.കെ.ജി. ക്ലബിനടുത്തെ വീട്ടില്‍നിന്ന് തിങ്കളാഴ്ച വൈകുന്നേരം അഞ്ചുമണിയോടെയാണ് സംഭവം. ജയപ്രകാശ് 108 ആംബുലന്‍സില്‍ വിളിച്ച് ഭാര്യ തനിക്ക് വിഷം നല്‍കിയെന്നും രക്ഷിക്കണമെന്നും പറയുകയായിരുന്നു.

ഭാര്യ തനിക്ക് ഒരു വെളുത്ത പൊടി തന്നു. അത് താന്‍ കഴിച്ചു. അല്‍പം കഴിഞ്ഞപ്പോള്‍ തനിക്ക് ഛര്‍ദ്ദിയുണ്ടായി. അസ്വസ്ഥത അനുഭവപ്പെട്ടപ്പോള്‍ എന്താണ് തനിക്ക് തന്നതെന്ന് ചോദിച്ചപ്പോള്‍ വിഷമാണെന്നും താന്‍ നേരത്തെ കഴിച്ചിട്ടുണ്ടെന്നും പറഞ്ഞു. അപ്പോള്‍ തന്നെ താന്‍ ആംബുലന്‍സ് വിളിച്ചെന്നും ജയപ്രകാശ് ജില്ലാ ആശുപത്രിയിലെ ഡോക്ടറോട് പറഞ്ഞു.

ഇയാളുടെ മൊഴി പൂര്‍ണമായും വിശ്വസിക്കാനായിട്ടില്ലെന്നും തുടരന്വേഷണത്തിലേ കാര്യങ്ങള്‍ വ്യക്തമാവുകയുള്ളൂവെന്നും പൊലിസ് പറഞ്ഞു.