തിരുവനന്തപുരം: കൊവിഡ് പ്രതിരോധം പാളിയെന്ന പ്രതിപക്ഷ വിമര്‍ശനങ്ങള്‍ക്ക് മറുപടിയുമായി മുഖ്യമന്ത്രി പിണറായി വിജയന്‍. കേരളത്തില്‍ ഒരാള്‍ക്കു പോലും കൊവിഡ് കാലത്ത് വിശന്നുറങ്ങേണ്ടിവന്നിട്ടില്ലെന്നും മൃതദേഹങ്ങള്‍ പുഴകളിലൂടെ ഒഴുകിനടക്കുന്ന സാഹചര്യമുണ്ടായില്ലെന്നും'ചിന്ത' വാരികയിലെഴുതിയ ലേഖനത്തില്‍ മുഖ്യമന്ത്രി വ്യക്തമാക്കി. 

 

മറ്റിടങ്ങളെ അപേക്ഷിച്ച് കേരളത്തില്‍ വൈകിയാണ് രണ്ടാം തരംഗം തുടങ്ങിയതെന്നും നമ്മുടെ നാട്ടില്‍ ഈ രോഗബാധയേല്‍ക്കാന്‍ തരത്തിലുള്ള അപകടഘടകമുള്ളവര്‍ ധാരാളമുണ്ടെന്നും അറിയാത്തവരല്ല വിമര്‍ശകര്‍. ഏറ്റവും ജനസാന്ദ്രതയുള്ള പ്രദേശമാണ് നമ്മുടേതെന്നും വിദേശരാജ്യങ്ങളുമായി ബന്ധപ്പെട്ടുകിടക്കുന്ന നാടാണിതെന്നും അവര്‍ക്കറിയാം. ഇതെല്ലാം മറച്ചുവച്ച് ബോധപൂര്‍വം ആശയക്കുഴപ്പം സൃഷ്ടിക്കുകയാണ്. 

 

കൊവിഡ് പ്രതിരോധത്തില്‍ നമ്മുടെ മാതൃക തെറ്റാണെന്നാണ് ഇവര്‍ പറയുന്നത്. എങ്കില്‍ ഏതു മാതൃകയാണ് നാം സ്വീകരിക്കേണ്ടത്? കേരളത്തില്‍ ഒരാള്‍ പോലും ഓക്‌സിജന്‍ കിട്ടാതെ മരിച്ചിട്ടില്ല. ആര്‍ക്കും ആരോഗ്യസേവനങ്ങളോ അടിയന്തര ഘട്ടങ്ങളില്‍ ആശുപത്രിക്കിടക്കകളോ ലഭിക്കാതിരുന്നില്ല. നമ്മുടെ സംസ്ഥാനത്തെ കൊവിഡ് മരണനിരക്ക് 0.5 ശതമാനത്തിലും താഴെയാണ്. ഇന്ത്യയിലെ മരണനിരക്കിന്റെ മൂന്നിലൊന്നു മാത്രമാണത്. ആയിരക്കണക്കിനു മൃതദേഹങ്ങള്‍ അനാഥപ്രേതങ്ങളെപ്പോലെ പുഴകളില്‍ ഒഴുകിനടക്കുന്നതും തീയണയാത്ത ചുടലപ്പറമ്പുകളും നാം കണ്ടതാണ്. എന്നാല്‍ ഇവിടെ മരിച്ച ഒരാളെപ്പോലും തിരിച്ചറിയാതിരുന്നില്ല. ഒരു മൃതദേഹവും അപമാനിക്കപ്പെട്ടില്ല. മുന്‍കൂട്ടിക്കണ്ട് തയാറെടുപ്പുകള്‍ നടത്തിയതുകൊണ്ടാണ് മറ്റു സംസ്ഥാനങ്ങള്‍ക്കു വരെ ഓക്‌സിജന്‍ നല്‍കാന്‍ നമുക്കായത്. ഇത്തരത്തില്‍ ലഭ്യമായ സംവിധാനങ്ങളെ കവച്ചുവെയ്ക്കുന്ന രീതിയില്‍ കൊവിഡിനെ പ്രതിരോധിക്കാന്‍ സംസ്ഥാനത്തിന്റെ കഴിവിലും ഉപരിയായി പ്രവര്‍ത്തിച്ചു എന്നതാണ് അവര്‍ പ്രചരിപ്പിക്കുന്ന വീഴ്ചയെങ്കില്‍ ആ വീഴ്ച വരുത്തിയതില്‍ സര്‍ക്കാര്‍ അഭിമാനം കൊള്ളുന്നെന്നും ലേഖനത്തില്‍ പറയുന്നു.