ലക്‌നൗ: പശുവിനെ ദേശീയമൃഗമായി പ്രഖ്യാപിക്കണമെന്നും പശുവിന് മൗലികാവകാശങ്ങള്‍ നല്‍കണമെന്നുമുള്ള വിവാദ പരാമര്‍ശങ്ങളുമായി അലഹബാദ് ഹൈക്കോടതി ജഡ്ജി. പശുവിനെ കശാപ്പ് ചെയ്ത സംഭവത്തില്‍ അറസ്റ്റിലായ ജാവേദ് എന്നയാള്‍ക്കു ജാമ്യം നിഷേധിച്ചുള്ള ഉത്തരവ് പുറപ്പെടുവിക്കുന്നതിനിടെയാണ് ജസ്റ്റിസ് ശേഖര്‍കുമാര്‍ യാദവ് ഈ പരാമര്‍ശങ്ങള്‍ നടത്തിയത്.
പശുവിനെതിരായി സംസാരിക്കുന്നവരെ ശിക്ഷിക്കാന്‍ കടുത്ത നിയമങ്ങള്‍ കൊണ്ടുവരണമെന്നും ശേഖര്‍ യാദവ് പറഞ്ഞു.

പശു ഇന്ത്യന്‍ സംസ്‌കാരത്തില്‍ വളരെ പ്രാധാന്യമുള്ള ജീവിയാണ്. പശുസംരക്ഷണം ഒരു മതത്തിന്റെ മാത്രം കാര്യമല്ല. ഇന്ത്യയുടെ സംസ്‌കാരമാണ്. പശു ആദരിക്കപ്പെട്ടാല്‍ മാത്രമാണ് രാജ്യം പുരോഗതി നേടുക എന്നതടക്കമുള്ള പരാമര്‍ശവും സിംഗിള്‍ ബെഞ്ച് നടത്തി. പ്രതിക്കു ജാമ്യം നല്‍കിയാല്‍ അതു സാമൂഹിക സാഹോദര്യത്തെ ബാധിക്കുമെന്നും രാജ്യത്തിന്റെ വിശ്വാസത്തിനും സംസ്‌കാരത്തിനും വേദനിച്ചാല്‍ രാജ്യം ക്ഷയിക്കുമെന്നും ജഡ്ജി പറഞ്ഞു.
ബീഫ് ഭക്ഷിക്കുന്നതു മൗലികാവകാശമായി കണക്കാക്കാനാകില്ല. പ്രായമായാലും രോഗിയായാലും ഉപകാരമുള്ള ജീവിയാണ് പശു.
ഹിന്ദുക്കള്‍ മാത്രമല്ല, മുന്‍കാലത്തെ മുസ്‌ലിം ഭരണാധികാരികളും പശുവിനെ അറുക്കുന്നതു നിരോധിച്ചിട്ടുണ്ടെന്നും വിവാദ പരാമര്‍ശത്തില്‍ ജഡ്ജി നിരീക്ഷിച്ചു. പശുസംരക്ഷണത്തെക്കുറിച്ച് സംസാരിക്കുന്നവര്‍തന്നെ അതിനെ ഭക്ഷിക്കുന്നത് സങ്കടകരമാണെന്നും ജഡ്ജി പരാമര്‍ശിച്ചിട്ടുണ്ട്. പശുവിനെ സംരക്ഷിക്കാനും അതിന് മൗലികാവകാശം നല്‍കാനുമുള്ള ബില്‍ പാര്‍ലമെന്റില്‍ അവതരിപ്പിക്കണമെന്നും ജഡ്ജി ആവശ്യപ്പെട്ടു.
ബീഫ് കഴിച്ചതിന്റെ പേരില്‍ യു.പി അടക്കമുള്ള സംസ്ഥാനങ്ങളില്‍ ആള്‍ക്കൂട്ട ആക്രമണവും കൊലപാതകവും അടക്കം അരങ്ങേറുന്നതനിടയിലാണ് അലഹബാദ് ഹൈക്കോടതിയുടെ നിരീക്ഷണം എന്നത് ആശങ്കയോടെയാണ് മതേതര ഇന്ത്യയിലെ ഭൂരിപക്ഷംപേരും കാണുന്നത്.