പുതിയ ഐപിഎല്‍ സീസണ്‍ മാര്‍ച്ച് 22നാണ് ആരംഭിച്ചത്. രാജ്യത്ത് പാര്‍ലമെന്റ് തിരഞ്ഞെടുപ്പ് നടക്കുന്നതുമായി ബന്ധപ്പെട്ട് ആദ്യ ഘട്ടത്തെ മത്സരക്രമം മാത്രമാണ് ബിസിസിഐ അറിയിച്ചത്. ഇപ്പോഴിതാ ഐപിഎല്‍ ഫൈനല്‍ ചെന്നൈയില്‍ നടക്കുമെന്നാണ് അനൗദ്യോഗിക റിപ്പോര്‍ട്ടുകള്‍ പുറത്തുവരുന്നത്. ഫൈനലിന്  അഹമ്മദാബാദിലെ നരേന്ദ്ര മോദി സ്റ്റേഡിയം വേദിയാവുമെന്നായിരുന്നു മുന്‍പ് പുറത്തുവന്ന അഭ്യൂഹങ്ങള്‍.

എന്നാല്‍ ഇത്തവണ ക്വാളിഫയര്‍, എലിമിനേറ്റര്‍ മത്സരങ്ങള്‍ അഹമ്മദാബാദിനു നല്‍കി ഫൈനല്‍  ചെന്നൈ ചെപ്പോക്കിലെ ചിദംബരം സ്റ്റേഡിയത്തിലേക്ക് മാറ്റുകയാണ്. 
നിലവിലെ ചാമ്പ്യന്‍മാരുടെ ഹോം ഗ്രൗണ്ടില്‍ ഉദ്ഘാടന മത്സരവും ഫൈനലും നടത്തുക എന്ന അലിഖിത നിയമമാണ് ഇത്തവണ പാലിക്കുന്നത്. അങ്ങനെയെങ്കില്‍ ചെന്നൈ ഫൈനലില്‍ എത്തിയാല്‍ സ്വന്തം ഹോംഗ്രൗണ്ടില്‍ തന്നെ ധോണിക്ക് അവസാന മത്സരം കളിക്കാം. ആരാധകര്‍ കാത്തിരിക്കുന്നതും അതിനാണ്.

പൊതു തെരഞ്ഞെടുപ്പ് തീയതികള്‍ പ്രഖ്യാപിച്ച സാഹചര്യത്തില്‍ ഐപിഎല്ലിലെ ശേഷിക്കുന്ന മത്സരങ്ങളുടെയും പ്ലേഓഫ് മത്സരങ്ങളുടെയും കാര്യത്തില്‍ ഉടനേയൊരു ഔദ്യോഗിക അറിയിപ്പ് ഉണ്ടാകും. ജൂണ്‍ ഒന്നു മുതല്‍ ടി20 ലോകകപ്പ് ആരംഭിക്കുന്നതിനാല്‍ അതിനുമുന്‍പ് മതിയായ വിശ്രമം താരങ്ങള്‍ക്ക് നല്‍കേണ്ടതുണ്ട്. ഇതുകൂടെ പരിഗണിച്ചാവും രണ്ടാംഘട്ട മത്സരങ്ങള്‍ ക്രമീകരിക്കുന്നത്.