നീലേശ്വരം: അധ്യാപകരെയും വിദ്യാര്‍ഥികളെയും വലച്ചുള്ള അവധി പ്രഖ്യാപനങ്ങള്‍ തുടരുന്നു. കഴിഞ്ഞദിവസം നടന്ന പി.എസ്.സി പരീക്ഷയുമായി ബന്ധപ്പെട്ടു അവധി പ്രഖ്യാപിച്ചതും പിന്നീട് അതു പിന്‍വലിച്ചതുമാണ് ഇതില്‍ അവസാനത്തേത്. ഇന്നലെ നടന്ന കേരള സ്റ്റേറ്റ് സിവില്‍ സപ്ലൈസ് കോര്‍പറേഷനിലെ അസിസ്റ്റന്റ് തസ്തികയിലേക്കുള്ള പരീക്ഷയുടെ സെന്ററുകളായ സ്‌കൂളുകള്‍ക്ക് അവധി പ്രഖ്യാപിക്കാന്‍ വിദ്യാഭ്യാസ ഉപ ഡയറക്ടര്‍മാരെ ചുമതലപ്പെടുത്തി  ഉത്തരവിറക്കിയത് 22ാം തിയതിയാണ്. അക്കാദമിക് അഡീഷനല്‍ ഡയറക്ടര്‍ ജിമ്മി കെ ജോസിന്റേതായിരുന്നു ഉത്തരവ്. ഇതിന്റെ അടിസ്ഥാനത്തില്‍ തൊട്ടടുത്തദിവസം തന്നെ പരീക്ഷാ കേന്ദ്രങ്ങളായ സ്‌കൂളുകള്‍ക്കു അവധി നല്‍കിക്കൊണ്ടുള്ള ഉത്തരവുമിറങ്ങി.
 എന്നാല്‍ ആയിരം അധ്യയന മണിക്കൂറുകള്‍ തികയ്ക്കാനായി സ്‌കൂളുകള്‍ക്ക് അവധി കൊടുക്കാനാവില്ലെന്ന നിലപാടിലേക്ക് കഴിഞ്ഞദിവസം വിദ്യാഭ്യാസ വകുപ്പ് എത്തുകയായിരുന്നു. ഇതേത്തുടര്‍ന്നു വെള്ളിയാഴ്ച വൈകിട്ട് മൂന്നു മണിയോടെ പി.എസ്.സി പരീക്ഷ നടക്കുന്ന സ്‌കൂളുകള്‍ ഉച്ചവരെ പ്രവര്‍ത്തിക്കണമെന്ന ഉത്തരവ് സ്‌കൂള്‍ മെയിലുകളിലേക്കയച്ചു കൊടുത്തു. പൊതുവിദ്യാഭ്യാസ അഡീഷനല്‍ ഡയറക്ടര്‍ ജെസി ജോസഫിന്റേതായിരുന്നു  ഉത്തരവ്. എന്നാല്‍ വൈകിട്ടായതിനാല്‍ പല സ്‌കൂള്‍ അധികൃതരും മെയില്‍ ശ്രദ്ധിച്ചില്ല. സ്‌കൂളിനു അവധി നല്‍കിക്കൊണ്ടുള്ള നോട്ടിസുകള്‍ ക്ലാസുകളില്‍ വായിക്കുകയും ചെയ്തു.
പിന്നീടാണ് അവധി റദ്ദു ചെയ്ത വിവരം സ്‌കൂള്‍ അധികൃതരും അറിയുന്നത്.