സ്വന്തം ലേഖകന്‍
കൊച്ചി: ഹൈക്കോടതിയിലെ അസിസ്റ്റന്റ് സോളിസിറ്റര്‍ ജനറല്‍ നിയമനത്തില്‍ ആര്‍.എസ്.എസിനെ വെട്ടാന്‍ ബി.ജെ.പി നീക്കം തുടങ്ങി.
നിലവിലെ എ.എസ്.ജി പി. വിജയകുമാര്‍ ഈ ഡിസംബറില്‍ വിരമിക്കുകയാണ്. ഇദ്ദേഹം ആര്‍.എസ്.എസ് നേതൃത്വത്തിന്റെ ശുപാര്‍ശയില്‍ നിയമിക്കപ്പെട്ടതാണ്. നിയമനകാര്യത്തില്‍ തര്‍ക്കമുണ്ടായപ്പോഴാണ് ആര്‍.എസ്.എസ് വിജയകുമാറിനെ ശുപാര്‍ശ ചെയ്തത്. വീണ്ടും എ.എസ്.ജി പോസ്റ്റില്‍ ഒഴിവു വരുമ്പോഴാണ് ആര്‍.എസ്.എസും ബി.ജെ.പിയും തമ്മില്‍ തര്‍ക്കം തുടങ്ങിയത്.
പാര്‍ട്ടി താല്‍പര്യങ്ങള്‍ അറിയുന്ന ഒരു വ്യക്തിക്കുതന്നെ എ.എസ്.ജി നിയമനം നല്‍കണമെന്നും സംസ്ഥാന നേതൃത്വവുമായി കൂടിയാലോചിച്ചുമാത്രമേ നിയമനം നടത്താവൂ എന്നും ബി.ജെ.പി സംസ്ഥാന ഘടകം കേന്ദ്രത്തോട് ആവശ്യപ്പെട്ടിട്ടുണ്ട്. ഇതനുസരിച്ച് പത്തു പേരുടെ പട്ടികയും കേന്ദ്രത്തിന് നല്‍കിയിട്ടുണ്ട്.

അതേസമയം, മുമ്പ് നിയമിച്ചതുപോലെ പുതിയ എ.എസ്.ജിയെ കണ്ടെത്താന്‍ ആര്‍.എസ്.എസിനുള്ളില്‍ ചര്‍ച്ചകള്‍ പുരോഗമിക്കുന്നുമുണ്ട്. ഇക്കാര്യം അറിയാമായിരുന്നിട്ടും തങ്ങള്‍ക്ക് താല്‍പര്യമുള്ളവരെ നിയമിക്കണമെന്ന് ആവശ്യപ്പെട്ട് സംസ്ഥാന ബി.ജെ.പി നേതൃത്വം കേന്ദ്രത്തെ സമീപിച്ചത് തെരഞ്ഞെടുപ്പിനു ശേഷം ആര്‍.എസ്.എസുമായി തുടരുന്ന അസ്വാരസ്യമാണ് വെളിവാക്കുന്നത്.
മുതിര്‍ന്ന അഭിഭാഷകനായ ഡി.സി കൃഷ്ണന്‍, ലക്ഷദ്വീപ് സ്റ്റാന്‍ഡിങ് കൗണ്‍സല്‍ അഡ്വ. എസ്. മനു എന്നിവരാണ് ബി.ജെ.പി നല്‍കിയ പട്ടികയില്‍ മുന്നില്‍. കസ്റ്റംസ് സ്റ്റാന്‍ഡിങ് കൗണ്‍സല്‍ അഡ്വ. ശ്രീജിത്ത് പി.ആറും പട്ടികയിലുണ്ട്. ചില മുതിര്‍ന്ന ബി.ജെ.പി നേതാക്കളുടെ നോമിനികളും പട്ടികയിലുണ്ട്.