സഊദി അറേബ്യ ഹജ്ജ് - ഉംറ മന്ത്രി ഇന്ത്യയിൽ; തീർഥാടകർക്ക് മെച്ചപ്പെട്ട സേവനമൊരുങ്ങും

ന്യൂഡൽഹി: സഊദി അറേബ്യ ഹജ്ജ് - ഉംറ മന്ത്രി തൗഫീഖ് ബിൻ ഫൗസാൻ അൽ റബീഅ ഇന്ത്യയിലെത്തി. ഇന്ത്യൻ ഹജ്ജ് തീർഥാടകരെയും ഉംറ നിർവഹിക്കുന്നവരെയും ആതിഥ്യമരുളുന്നതിനുള്ള സമഗ്രമായ പദ്ധതികൾ ആവിഷ്‌കരിക്കാനും ഇരുരാജ്യങ്ങളുടെയും സഹകരണം ശക്തിപ്പെടുത്തുന്നതും ലക്ഷ്യമിട്ടാണ് സഊദി മന്ത്രിയുടെ സന്ദർശനം. ഹജ്ജ് - ഉംറ മന്ത്രാലയത്തിലെ ഉന്നത ഉദ്യോഗസ്ഥരും സ്വകാര്യ മേഖലയിലെയും അനുബന്ധ സ്ഥാപനങ്ങളിലെയും പ്രതിനിധികളും അദ്ദേഹത്തോടൊപ്പം ഇൻഡയിലെത്തിയിട്ടുണ്ട്.

ഇന്ത്യൻ നേതാക്കളുമായും ഹജ്ജ്, ഉംറ സേവന മേഖലയിലെ പ്രമുഖരുമായും തൗഫീഖ് ബിൻ ഫൗസാൻ അൽ റബീഅ ഉന്നതതല ചർച്ചകൾ നടത്തുമെന്ന് ഡൽഹിയിലെ സഊദി എംബസി അറിയിച്ചു. തീർഥാടകർക്ക് ഗുണപരവും അതുല്യവുമായ സൗകര്യങ്ങൾ കൊണ്ടുവരിക, അവരെയും സന്ദർശകരെയും മികച്ച ആതിഥ്യമര്യാദയോടെ സേവിക്കുന്നതിനുള്ള സഊദി അറേബ്യയുടെ ശാശ്വതമായ നടപടികൾ ലോകത്തിന് മുന്നിൽ എത്തിക്കുന്നതിന്റെ ഭാഗമായി മന്ത്രി വിവിധ രാജ്യങ്ങളിൽ സന്ദർശനം നടത്തുന്നുണ്ട്. ഇതിന്റെ ഭാഗമായാണ് ഇന്ത്യയിലുമെത്തിയത്.

സഊദിയുടെ 'വിഷൻ 2030' പദ്ധതികളുടെ കൂടി ഭാഗമായി ഉംറ നടപടിക്രമങ്ങളും സേവനങ്ങളും മെച്ചപ്പെടുത്തുന്നതിലും തീർഥാടകർക്കും ഉംറ നിർവഹിക്കാനെത്തുന്നവർക്കും സമഗ്ര പദ്ധതിയൊരുക്കുന്നതിലും കാര്യമായ പുരോഗതി കൈവരിക്കാൻ ലക്ഷ്യമിട്ടാണ് മന്ത്രിയുടെ ഇന്ത്യാ സന്ദർശനം. ഉംറ സന്ദർശനത്തിന്‍റെ നടപടിക്രമങ്ങൾ മെച്ചപ്പെടുത്തുന്നതിന്‍റെ ഭാഗമായി നുസൂക് പ്ലാറ്റ്ഫോമിന്‍റെയും തഷീർ ഇ-വിസ കേന്ദ്രത്തിന്‍റെയും ഉദ്ഘാടന പ്രദർശനവും സംഘടിപ്പിക്കും. ഇന്ത്യൻ തീർഥാടകർക്ക് തടസമില്ലാത്തതും സൗകര്യപ്രദവുമായ സേവനം ലഭ്യമാക്കുന്നതിന്‍റെ ഭാഗമായാണിത്.