കൊച്ചി: മോന്‍സന്‍ മാവുങ്കലുമായി അടുത്ത ബന്ധമുണ്ടെന്ന് ആരോപണമുയര്‍ന്ന ചേര്‍ത്തല സി.ഐയെ സ്ഥലംമാറ്റി. ചേര്‍ത്തല സി.ഐ. പി. ശ്രീകുമാറിനെയാണ് പാലക്കാട് ക്രൈംബ്രാഞ്ചിലേക്ക് സ്ഥലംമാറ്റിയത്.

മോന്‍സന്‍ മാവുങ്കലും ചേര്‍ത്തല സി.ഐ.ശ്രീകുമാറും ഏറെക്കാലമായി അടുപ്പത്തിലാണ്. മോന്‍സനെതിരെ കേസുകള്‍ ഉയര്‍ന്നപ്പോളെല്ലാം സി.ഐ സഹായിച്ചു. മോന്‍സനെതിരെ പരാതി പറയാന്‍ വിളിച്ച യുവതിയെ ശ്രീകുമാര്‍ ഭീഷണിപ്പെടുത്തിയതായും ആരോപണം ഉയര്‍ന്നിരുന്നു. ശ്രീകുമാറും മോന്‍സനും തമ്മിലെന്ന പേരില്‍ ഫോണ്‍ സംഭാഷണവും പുറത്തു വന്നു. മോന്‍സന്‍ പങ്കെടുത്ത ചടങ്ങുകളില്‍ പലതിലും സി.ഐ.ശ്രീകുമാറും ഒപ്പം ഉണ്ടായിരുന്നു.

അതേസമയം, മോണ്‍സന്‍ മാവുങ്കലിന്റെ കടലാസ് കമ്പനിയായ കലിങ്ക കല്ല്യാണ്‍ പ്രൈവറ്റ് ലിമിറ്റഡിനെ സംബന്ധിച്ചുള്ള അന്വേഷണവും ക്രൈംബ്രാഞ്ച് വ്യാപിപ്പിച്ചിട്ടുണ്ട്. മോന്‍സന്റെ കൈവശമുള്ള രേഖകളുടെ പരിശോധനയും നാളെ തുടങ്ങും. എച്ച്.എസ്.ബി.സി ബാങ്കിന്റെ പേരില്‍ നിര്‍മിച്ചത് വ്യാജ രേഖകള്‍ ആണെന്ന് കഴിഞ്ഞ ദിവസം ബാങ്ക് അധികൃതര്‍ സ്ഥിരീകരിച്ചിരുന്നു.