ദുബൈ: ലോക വിപണിയിലെ ഏറ്റവും വേഗതയേറിയ സൂപ്പര്‍കാറുകളിലൊന്നായ മക്ലാരന്‍ അര്‍തുറ ഇനി ദുബൈ പോലീസിന് സ്വന്തം. മണിക്കൂറില്‍ 330 കിലോമീറ്റര്‍ വേഗമുണ്ട് മക്ലാരന്‍ അര്‍തുറയ്ക്ക്. 3.0 സെക്കന്‍ഡ് കൊണ്ട് 100 കിലോ മീറ്റര്‍ വേഗത കൈവരിക്കാനും ശേഷിയുണ്ട്.

പട്രോളിങിന് ദുബൈ പോലീസ് ഉപയോഗിക്കുന്ന വിവിധതരം സൂപ്പര്‍ കാറുകളുടെ ശ്രേണി പ്രസിദ്ധമാണ്. അതിലേക്കുള്ള ഏറ്റവും പുതിയ കൂട്ടിച്ചേര്‍ക്കലാണ് മക്ലാരന്‍ അര്‍തുറ. ആസ്റ്റണ്‍ മാര്‍ട്ടിന്‍, ബുഗാട്ടി, ഫെരാരി, ബെന്റ്ലി, പോര്‍ഷെ, ലംബോര്‍ഗിനി തുടങ്ങിയ കാറുകള്‍ ദുബൈ പോലീസിന്റെ ശേഖരത്തിലുണ്ട് . ആഡംബര സ്പീഡ് ബോട്ടുകളും ത്രി ഡി പ്രിന്റഡ് SWAT സൂപ്പര്‍ട്രക്കുമുണ്ട്.

ദുബൈ നഗരത്തില്‍ എവിടെയും സെക്കന്റുകള്‍ക്കുള്ളില്‍ മക്ലാരന്‍ പറന്നെത്തും. മക്ലാരന്‍ കമ്പനിയുടെ പുതുതലമുറ ഹൈബ്രിഡ് പെട്രോള്‍ സൂപ്പര്‍കാറാണ് അര്‍തുറ. വിമക്ലാരന്റെ എല്ലാ ഗുണങ്ങളും ഇതിനുണ്ട്. നൂതന എയറോഡൈനാമിക്സ്, അള്‍ട്രാ-ലൈറ്റ് സംവിധാനങ്ങള്‍, ട്വിന്‍-ടര്‍ബോ ചാര്‍ജ്ഡ് ഹൈബ്രിഡ് V6 എഞ്ചിനില്‍ നിന്നുള്ള ഇലക്ട്രിഫൈഡ് പവര്‍ എന്നിവ കാറിന്റെ മറ്റ് പ്രത്യേകതകളാണ്. എട്ട് സ്പീഡ് ട്രാന്‍സ്മിഷനും കോംപാക്റ്റ് ഇ-മോട്ടോറും ഉണ്ട്. ദുബായ് പോലീസ് സേനയ്ക്ക് അസാധാരണവും കാര്യക്ഷമവുമായ പ്രകടനം ഇത് ഉറപ്പുനല്‍കുന്നു. പ്ലഗ്-ഇന്‍ ഹൈബ്രിഡ് അള്‍ട്രാ ലൈറ്റ് വെഹിക്കിളിന് പെട്രോള്‍, ഇലക്ട്രിക് ഇന്ധന സ്രോതസ്സുകള്‍ എന്നിവയുമായി ചേര്‍ന്ന് 680 കുതിരശക്തി ഉത്പാദിപ്പിക്കാന്‍ കഴിയും.

പൊതുസുരക്ഷ ഉറപ്പാക്കുന്നതിനുള്ള ദൗത്യത്തില്‍ ദുബൈയിലെ പോലീസ് ഉദ്യോഗസ്ഥര്‍ ഉപയോഗിക്കുന്ന വാഹനങ്ങളിലെ അത്യാധുനിക സാങ്കേതികവിദ്യകളുടെയും അസാധാരണ പ്രകടനത്തിന്റെയും ഉത്തമ ഉദാഹരണമാണ് മക്ലാരന്‍ അര്‍തുറയെന്ന് ദുബൈ പോലീസ് കമാന്‍ഡര്‍-ഇന്‍-ചീഫ് ലെഫ്റ്റനന്റ് ജനറല്‍ അബ്ദുല്ല ഖലീഫ അല്‍ മര്‍റി പറഞ്ഞു.

പ്രമുഖ ഇമാറാത്തി കമ്പനിയായ ജുമാ ഖലീഫ അല്‍ നബൂദ ഗ്രൂപ്പിന്റെ ഭാഗമാണ് മക്ലാരന്‍ ദുബൈ. മക്ലാരന്‍ അര്‍തുറയ്ക്കൊപ്പം പ്രശസ്തമായ ദുബൈ പോലീസ് സേനയില്‍ ചേരുന്നത് അങ്ങേയറ്റം അഭിമാനമുള്ള കാര്യമാണെന്ന് ഖലീഫ ജുമാ അല്‍ നബൂദ ഗ്രൂപ്പ് ഓഫ് കമ്പനീസ് പ്രസ്താവിച്ചു. മക്ലാരന്‍ അര്‍തുറയുടെ അപാരമായ പ്രകടനവും കാര്യക്ഷമതയും പൊതുസുരക്ഷ ഉയര്‍ത്തിപ്പിടിക്കുന്നതിലും ദുബൈ പോലീസിന്റെ പ്രവര്‍ത്തനങ്ങളെ ശക്തിപ്പെടുത്തുന്നതിലും റോഡ് സുരക്ഷ ഉറപ്പാക്കുന്നതിലും നിര്‍ണായക പങ്ക് വഹിക്കുമെന്ന് കമ്പനി അഭിപ്രായപ്പെട്ടു.