തിരുവനന്തപുരം: കുഞ്ഞിനെ തട്ടിക്കൊണ്ടുപോയി ദത്ത് നല്‍കിയെന്ന പരാതിയില്‍ അനുപമയില്‍ നിന്നും അജിത്തില്‍ നിന്നും ശിശുവികസന ഡയറക്ടര്‍ മൊഴിയെടുക്കും. നാളെ വൈകീട്ട് നാല് മണിക്ക് പൂജപ്പുരയിലെ ഓഫിസില്‍ ഹാജരാകാനാണ് നിര്‍ദ്ദേശം നല്‍കിയത്. എല്ലാ രേഖകളും ഹാജരാക്കാനും നിര്‍ദ്ദേശം നല്‍കിയിട്ടുണ്ട്.

സംഭവം വിവാദമായ പശ്ചാത്തലത്തില്‍ വകുപ്പ് തല അന്വേഷണത്തിന് മന്ത്രി വീണാ ജോര്‍ജ് ഉത്തരവിട്ടിരുന്നു. ഈ അന്വേഷണത്തിന്റെ ഭാഗമായാണ് അജിത്തിന്റെയും അനുപമയുടെയും മൊഴിയെടുക്കുന്നത്.

കഴിഞ്ഞ ദിവസം ശിശുക്ഷേമ സമിതി ജനറല്‍ സെക്രട്ടറി ഷിജുഖാനെ വിളിച്ചുവരുത്തി വിശദീകരണം തേടിയിരുന്നു.

കൂടാതെ വനിതാ കമ്മിഷന് അനുപമ നല്‍കിയ പരാതിയുടെ പശ്ചാത്തലത്തില്‍ നവംബര്‍ അഞ്ചിന് നടക്കുന്ന സിറ്റിങില്‍ ഹാജാരാകാനും നിര്‍ദേശമുണ്ട്.