മഞ്ചേരി: ആനക്കയം വള്ളിക്കാപറ്റ പൂങ്കുടില്‍ മനക്ക് സമീപം സിദ്ദീഖിയ റോഡില്‍ ഓട്ടോ താഴ്ചയിലേക്ക് മറിഞ്ഞുണ്ടായ അപകടത്തില്‍ മരണം നാലായി. ആനക്കയം ചേപ്പൂര്‍ കൂരിമണ്ണില്‍ പൂവത്തിക്കല്‍ ഖൈറുന്നീസ (46), സഹോദരന്‍ ഉസ്മാന്‍ (36), ഭാര്യ കൂട്ടിലങ്ങാടി കൊഴിഞ്ഞില്‍ സ്വദേശിനി ചുള്ളിയില്‍ സുലൈഖ (33), ഓട്ടോ ഡ്രൈവര്‍ ചേപ്പൂര്‍ സ്വദേശി ചുണ്ടിയന്‍മൂച്ചി ഹസ്സന്‍കുട്ടി (52) എന്നിവരാണ് മരിച്ചത്. 

ഖൈറുന്നീസയുടെ മക്കളായ അഫ്‌നാസ് (ഒമ്പത്), അബിന്‍ഷാന്‍ (ഏഴ്), ഉസ്മാന്റെ മക്കളായ നിഷാദ് (11), നിഷാല്‍ (എട്ട്) എന്നിവര്‍ക്ക് പരുക്കേറ്റു. ഇവരെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. മൂന്നുപേര്‍ സംഭവസ്ഥലത്തുതന്നെ മരിച്ചിരുന്നു. ഗുരുതര പരുക്കേറ്റ ഓട്ടോ ഡ്രൈവര്‍ ഹസന്‍കുട്ടിയെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചെങ്കിലും അഞ്ചരയോടെ മരിച്ചു.