കോഴിക്കോട്: 'നീണ്ടു നില്‍ക്കുന്ന ജോലി സമയം, തുടര്‍ച്ചയായ രാത്രി ഷിഫ്റ്റുകള്‍' ദുരിതങ്ങളുടെ വാഗണിലാണ് ഇന്ത്യന്‍ റെയില്‍വേയിലെ ലോക്കോ പൈലറ്റുമാരുടെ ജീവിതം. അതുകൊണ്ടുതന്നെ അമിത ജോലിയും വിശ്രമവുമില്ലാതെ കടുത്ത സമ്മര്‍ദ്ദത്തിലാണിവര്‍. ആഴ്ചയില്‍ 30 മണിക്കൂര്‍ വിശ്രമം വേണമെന്നാണ് ചട്ടം. അതൊന്നും ലഭിക്കുന്നില്ല. നേരത്തേ ഡ്യൂട്ടിസമയം എട്ട് മണിക്കൂറായിരുന്നു. പിന്നീടത് പത്തു മണിക്കൂറാക്കി. വലിയ പരാതിക്കിടയാക്കിയിരുന്നെങ്കിലും മാറ്റമുണ്ടായില്ല. അതിന് പുറമെയാണ് ജീവനക്കാരുടെ ക്ഷാമംമൂലം ജോലി സമയം വീണ്ടും വര്‍ധിപ്പിച്ചത്.

ജോലി സമയം കുറയ്ക്കണമെന്നു വിവിധ കമ്മിറ്റികള്‍ സര്‍ക്കാറിനു റിപ്പോര്‍ട്ട് നല്‍കിയിരുന്നുവെങ്കിലും ഒന്നും നടപ്പായില്ല. തുടര്‍ച്ചയായ ഡ്യൂട്ടി കഴിഞ്ഞാല്‍ വിശ്രമത്തിനനുവദിക്കണമെന്നും ചട്ടമുണ്ട്. എന്നാല്‍ ഇതെല്ലാം ലഭിക്കാതെയാണ് ഇവര്‍ ജോലി തുടരുന്നത്. ഇനിയും ക്ഷമിക്കാന്‍ വയ്യ. അതുകൊണ്ട് ജൂണ്‍ ഒന്നു മുതല്‍ അധികജോലി സമയം ബഹിഷ്‌കരിച്ചുള്ള സമരത്തിന് ഒരുങ്ങുകയാണിവര്‍. ജോലിസമയം പത്തുമണിക്കൂറാക്കി കുറയ്ക്കാനുള്ള റെയില്‍വേ ബോര്‍ഡ് ഉത്തരവ് സ്വയം നടപ്പാക്കാനാണ് തീരുമാനം. ഉത്തരവ് റെയില്‍വേ നടപ്പാക്കാത്ത സാഹചര്യത്തിലാണ് സ്വയം നടപ്പാക്കിയുള്ള പ്രതിഷേധസമരത്തിന് തുടക്കം കുറിക്കുന്നത്.

ഒരു ലോക്കോ പൈലറ്റും അസി.ലോക്കോ പൈലറ്റുമാണ് തീവണ്ടിയില്‍ ഉണ്ടാവുക. ആള്‍ക്ഷാമംമൂലം നട്ടംതിരിയുകയാണ് റെയില്‍വേ വകുപ്പും ജീവനക്കാരും. ജീവനക്കാര്‍ക്ക് അത്യാവശ്യത്തിനുപോലും ലീവ് എടുക്കാനാവില്ല. ലോക്കോ പൈലറ്റുമാരെ അസിസ്റ്റന്റുമാരായാണ് നിയമിക്കുക. ഗുഡ്സ് ലോക്കോ പൈലറ്റ്, പാസഞ്ചര്‍ ലോക്കോ, എക്‌സ്പ്രസ് പൈലറ്റ് എന്നിങ്ങനെ സ്ഥാനക്കയറ്റം നല്‍കും. എന്നാല്‍ വിശ്രമമില്ലാത്ത പ്രവൃത്തി ജോലിയെയും യാത്രക്കാരുടെ സുരക്ഷയെയും ഗുരുതരമായി ബാധിക്കുമെന്ന് ലോക്കോ പൈലറ്റുമാര്‍ തന്നെ പറയുന്നു. ഇക്കാര്യത്തില്‍ അധികൃതര്‍ നിസംഗത തുടരുകയാണ്. 

 ആഴ്ചയില്‍ 40 മണിക്കൂര്‍ വിശ്രമം അനുവദിക്കുക, തുടര്‍ച്ചയായുള്ള നൈറ്റ് ഡ്യൂട്ടി രണ്ടാക്കി ചുരുക്കുക, ജോലി സമയം പത്തുമണിക്കൂറായി ചുരുക്കുക തുടങ്ങിയ ആവശ്യങ്ങള്‍ ഉന്നയിച്ചാണ് ആള്‍ ഇന്ത്യ ലോക്കോ റണ്ണിംങ് സ്റ്റാഫ് അസോസിയേഷന്റെ നേതൃത്വത്തില്‍ സമരത്തിനിറങ്ങുന്നത്. ലോക്കോ പൈലറ്റുമാരുടെ സമരം തീവണ്ടി ഗതാഗതത്തെ സാരമായി ബാധിക്കാനിടയുണ്ട്.