ബംഗളൂരു: ബി.ജെ.പി നേതാവ് നല്‍കിയ മാനനഷ്ടക്കേസില്‍ കോണ്‍ഗ്രസ് നേതാവും എം.പിയുമായ രാഹുല്‍ ഗാന്ധിക്ക് ജാമ്യം. ബംഗളൂരു കോടതിയാണ് ജാമ്യം അനുവദിച്ചത്.2023 മേയില്‍ സംസ്ഥാന നിയമസഭ തെരഞ്ഞെടുപ്പില്‍ ബി.ജെ.പിക്കെതിരെ കോണ്‍ഗ്രസ് ഉന്നയിച്ച '40 ശതമാനം കമീഷന്‍' ആരോപണത്തിലായിരുന്നു പരാതി. ബി.ജെ.പി എം.എല്‍.സിയും കര്‍ണാടക ജനറല്‍ സെക്രട്ടറിയുമായ കേശവ് പ്രസാദ് ആണ് പരാതി നല്‍കിയത്. കോടതിയില്‍ ഹാജരാകാന്‍ രാഹുല്‍ ഇന്ന് രാവിലെ ബംഗളൂരുവില്‍ എത്തിയിരുന്നു. 

സംസ്ഥാനത്തെ മുന്‍ ബി.ജെ.പി സര്‍ക്കാര്‍ എല്ലാ സര്‍ക്കാര്‍ പദ്ധതി നടത്തിപ്പിനും 40 ശതമാനം കമീഷന്‍ ഈടാക്കിയെന്ന പരാമര്‍ശത്തിനെതിരെയാണ് കേശവ് പ്രസാദ് ഹരജി നല്‍കിയത്. മുഖ്യമന്ത്രി സിദ്ധരാമയ്യ, ഉപമുഖ്യമന്ത്രി ഡി.കെ. ശിവകുമാര്‍ എന്നിവര്‍ക്കെതിരെയും കേശവ് പ്രസാദ് മാനനഷ്ടക്കേസ് നല്‍കിയിരുന്നു. ഇരു നേതാക്കളും അഡീഷണല്‍ ചീഫ് മെട്രോപൊളിറ്റന്‍ മജിസ്‌ട്രേറ്റിന് മുമ്പാകെ നേരിട്ട് ഹാജരായി കേസില്‍ ജാമ്യം നേടി.