കല്‍പ്പറ്റ: രാഹുല്‍ ഗാന്ധി രണ്ടിടത്തൊന്നില്‍ ഇന്ന് രാജിക്കൊരുങ്ങവെ പിന്‍ഗാമിയാരെന്ന പ്രഖ്യാപനത്തിന് കാതോര്‍ത്ത് വയനാട്. വയനാട്ടില്‍ ഉപതെരഞ്ഞെടുപ്പ് ഉണ്ടാകുമെന്ന് ഏറെക്കുറെ മുന്നണികളും വോട്ടര്‍മാരും ഉറപ്പിച്ചിട്ടുണ്ട്. കഴിഞ്ഞ ദിവസം വോട്ടര്‍മാര്‍ക്ക് നന്ദി പറയാന്‍ രാഹുല്‍ ഗാന്ധി മണ്ഡലത്തിലെത്തിയപ്പോള്‍ കെ.പി.സി.സി പ്രസിഡന്റ് കെ. സുധാകരന്‍ വയനാട്ടില്‍ നിന്നുള്ള എം.പി സ്ഥാനം രാഹുല്‍ ഗാന്ധി രാജിവയ്ക്കുമെന്നും റായ്ബറേലി നിലനിര്‍ത്തുമെന്നുമുള്ള സൂചന നല്‍കിയിരുന്നു. ഇതിന് പിന്നാെല തന്നെ പിന്‍ഗാമി ആരെന്ന ചര്‍ച്ചയും ഉടലെടുത്തു.
ഉപതെരഞ്ഞെടുപ്പില്‍ സഹോദരി പ്രിയങ്കാ ഗാന്ധി മണ്ഡലത്തില്‍ സ്ഥാനാര്‍ഥിയാകണമെന്ന് കോണ്‍ഗ്രസ് പ്രവര്‍ത്തകരില്‍ ഭൂരിഭാഗവും ആഗ്രഹിക്കുന്നുണ്ടെങ്കിലും സംസ്ഥാന നേതാക്കള്‍ മതിയെന്ന നിലപാടാണ് ദേശീയ നേതൃത്വത്തിനുള്ളത്. തൃശൂരില്‍ പരാജയപ്പെട്ട കെ. മുരളീധരനെ വയനാട്ടില്‍ സ്ഥാനാര്‍ഥിയാക്കണമെന്ന ആവശ്യവും ഉയരുന്നുണ്ട്. ഇതോടെ പ്രിയങ്കയല്ലെങ്കില്‍ ആരെന്ന ചര്‍ച്ചകളും ആരംഭിച്ചിട്ടുണ്ട്. എങ്കിലും പ്രിയങ്ക ഗാന്ധിയോ, കെ. മുരളീധരനോ വയനാട്ടില്‍ മത്സരിക്കാനെത്തുമെന്ന പ്രതീക്ഷയിലാണ് യു.ഡി.എഫ് പ്രവര്‍ത്തകര്‍.

രാഹുല്‍ ഗാന്ധി മണ്ഡലമൊഴിയുന്നതില്‍ വയനാട്ടുകാര്‍ക്ക് എതിര്‍പ്പുണ്ട്. ദേശീയ നേതാവിനപ്പുറം രാഹുലിനെ തങ്ങളിലൊരുവനായാണ് വോട്ടര്‍മാരില്‍ ഭൂരിഭാഗവും നോക്കിക്കാണുന്നത്. അതിന്റെ പ്രതിഫലനമാണ് ഇത്തവണത്തെയും ലീഡിലുള്ളത്. പ്രതിസന്ധിഘട്ടങ്ങളിലെല്ലാം തങ്ങളെ സാന്ത്വനിപ്പിക്കാന്‍ ഓടിയെത്തിയ രാഹുലിനെ അവര്‍ അത്രയേറെ ഇഷ്ടപ്പെടുന്നുണ്ട്. അതേസമയം ഇന്ത്യയെ വീണ്ടെടുക്കാന്‍ രാഹുല്‍ ഉത്തരേന്ത്യയില്‍ തന്നെ വേണമെന്നതിനാല്‍ അദ്ദേഹം ഇവിടെ രാജിവയ്ക്കണമെന്ന് അഭിപ്രായപ്പെടുന്നവരും മണ്ഡലത്തിലുണ്ട്. രാഹുലൊഴിഞ്ഞാല്‍ സഹോദരി പ്രിയങ്ക ഗാന്ധി തന്നെ ഇവിടെ മത്സരിക്കണമെന്നതാണ് ഇവരുടെയെല്ലാം അഭിപ്രായം.
രാഹുല്‍ ഗാന്ധിയോട് പരാജയപ്പെട്ട സി.പി.ഐ ദേശീയ നേതാവ് ആനി രാജ മത്സരിക്കണമെന്ന് ഇടതുപക്ഷത്തിലെ ഒരു വിഭാഗം ആവശ്യപ്പെടുന്നുണ്ടെങ്കിലും സ്ഥാനാര്‍ഥി മണ്ഡലത്തില്‍ നിന്നുതന്നെയാകണമെന്ന ആവശ്യവുമുയരുന്നുണ്ട്. ഇത്തവണത്തെ വോട്ട് വര്‍ധനവ് നിലനിര്‍ത്താന്‍ പ്രാപ്തിയുള്ള സ്ഥാനാര്‍ഥിയെ സംസ്ഥാന നേതൃത്വം കളത്തിലിറക്കുമെന്നാണ് ബി.ജെ.പി പ്രവര്‍ത്തകര്‍ കരുതുന്നത്. 2019ല്‍ സസ്പെന്‍സുകള്‍ക്കൊടുവില്‍ ചുരം കയറിയെത്തിയ രാഹുല്‍ ഗാന്ധിയുടെ മടക്കവും മണ്ഡലത്തില്‍ സസ്പെന്‍സ് നിറയ്ക്കുകയാണ്. 364422 വോട്ടിന്റെ ഭൂരിപക്ഷത്തില്‍ 59.69 ശതമാനം വോട്ട് നല്‍കിയാണ് വയനാട് ലോക്സഭാ മണ്ഡലം രാഹുലിനെ ഇത്തവണ മണ്ഡലത്തിന്റെ പ്രതിനിധിയാക്കിയത്. 2019ല്‍ ദേശീയനേതാവിനെ ഇരുകൈയും നീട്ടി സ്വീകരിച്ച മലയോര ജനത ഇക്കുറിയും സ്നേഹത്തിന്റെ മാറ്റുകുറയ്ച്ചിരുന്നില്ലെന്നതാണ് മത്സരഫലം വ്യക്തമാക്കുന്നത്. രണ്ടിടത്തും സന്തോഷം നല്‍കുന്നതായിരിക്കും തന്റെ പ്രഖ്യാപനമെന്ന് നന്ദിയറിയിക്കാന്‍ വയനാട്ടിലെത്തിയപ്പോള്‍ രാഹുല്‍ പറഞ്ഞിരുന്നു. ഇതില്‍ പ്രിയങ്ക ഗാന്ധി വയനാട്ടിലെത്തുമെന്ന ധ്വനിയുണ്ടെന്നാണ് കോണ്‍ഗ്രസ് പ്രവര്‍ത്തകര്‍ പറയുന്നത്. എങ്കിലും ഇന്നത്തെ പ്രഖ്യാപനം വയനാടിനോ, റായ്ബറേലിക്കോ അനുകൂലമെന്നതിലേക്ക് കണ്ണുനട്ടിരിക്കുകയാണ് വോട്ടര്‍മാര്‍.