ന്യൂഡല്‍ഹി: 18ാം ലോകസഭയുടെ ആദ്യ സെഷനില്‍ തന്നെ പ്രതിപക്ഷത്തിന്റെ കരുത്തു കാട്ടാന്‍ പ്രതിപക്ഷം. പ്രതിഷേധത്തിലാണ് സഭയില്‍ ഇന്ന് പ്രതിപക്ഷത്തിന്റെ തുടക്കം.  പുതുതായി തെരഞ്ഞെടുക്കപ്പെട്ട എം.പിമാരുടെ സത്യപ്രതിജ്ഞാ ചടങ്ങില്‍ 
പ്രോ-ടേം സ്പീക്കറെ സഹായിക്കാന്‍ സ്പീക്കറുടെ കസേരയില്‍ ഇരിക്കേണ്ടെന്ന് ഇന്ത്യന്‍ ബ്ലോക്ക് നേതാക്കള്‍ തീരുമാനിച്ചിരിക്കുകയാണ്. പ്രോ ടേം സ്പീക്കറുടെ പാനലില്‍ നിന്ന് ഇന്‍ഡ്യ സഖ്യം പിന്‍മാറി. കൊടിക്കുന്നില്‍ സുരേഷിനെ പ്രോ ടേം സ്പീക്കറാക്കാത്തതിലുള്ള പ്രതിഷേധത്തിന്റെ ഭാഗമായാണ് തീരുമാനം.

എട്ടു തവണ എം.പിയായ കൊടിക്കുന്നില്‍ സുരേഷിനെ മാറ്റി നിര്‍ത്തി ഏഴു തവണ എം.പിയായ ബി.ജെ.പി എം.പിയെയാണ് പ്രോ-ടേം സ്പീക്കറായി നിയമിച്ചിരിക്കുന്നത്. 

പ്രോ-ടേം സ്പീക്കര്‍ പദവി നല്‍കാത്തതിലൂടെ അര്‍ഹതപ്പെട്ട അവസരമാണ് തനിക്ക് നിഷേധിച്ചതെന്ന് കൊടിക്കുന്നില്‍ സുരേഷ് മുന്‍പ് പറഞ്ഞിരുന്നു. ഇപ്പോഴത്തെ പ്രോ-ടേം സ്പീക്കര്‍ കാലുമാറി ബി.ജെ.പിയില്‍ ചേര്‍ന്നയാളാണ്. അങ്ങനെ ഒരാളുടെ മുന്നിലാണ് ഇന്ന് എം.പിമാര്‍ സത്യപ്രതിജ്ഞ ചെയ്യേണ്ടത്.ഇതിനെ ഇന്ത്യന്‍ ജനാധിപത്യത്തിന്റെ മൂല്യ ശോഷണമായിട്ടേ കാണാനാകൂ എന്നും കൊടിക്കുന്നില്‍ സുരേഷ് ചൂണ്ടിക്കാട്ടി. വിഷയത്തില്‍ ജാതി അധിക്ഷേപം ഉണ്ടായെന്നും അദ്ദേഹം ആരോപിക്കുന്നു.