നെയ്യാറ്റിന്‍കര: അമിതവേഗത്തിലെത്തിയ സ്‌കൂള്‍ ബസ് നിയന്ത്രണംവിട്ട് മതില്‍ ഇടിച്ചു തകര്‍ത്തു.
നെയ്യാറ്റിന്‍കര ഗവ.ഗേള്‍സ് ഹയര്‍ സെക്കന്‍ഡറി സ്‌കൂളിലെ ബസാണ് അപകടത്തില്‍ പെട്ടത്. ഇന്നലെ രാവിലെ 8.20 ന് പെരുമ്പഴുതൂര്‍ മുളളറുവിളയ്ക്ക് സമീപമായിരുന്നു അപകടം. ഇരുപതിലധികം കുട്ടികളുമായി അമിത വേഗത്തിലെത്തിയ ബസ് മങ്കോട്ടുകോണത്ത് ഇറക്കം ഇറങ്ങുന്നതിനിടെ നിയന്ത്രണം തെറ്റി കുഴിയിലേയ്ക്ക് പോകുമെന്നായപ്പോള്‍ ഡ്രൈവര്‍ ബസ് വെട്ടിത്തിരിച്ചപ്പോഴാണ് മതിലില്‍ ഇടിച്ചുകയറിയത്.
തലനാരിഴയ്ക്കാണ് വന്‍ ദുരന്തം ഒഴിവായത്. നിലവിളി കേട്ട് ഓടിയെത്തിയ സമീപവാസികള്‍ കുട്ടികളെയും ഡ്രൈവറെയും പുറത്തിറക്കുകയായിരുന്നു. കുട്ടികളെ സ്‌കൂള്‍ അധികൃതരുടെ നേതൃത്വത്തില്‍ മറ്റൊരു വാഹനത്തില്‍ സ്‌കൂളില്‍ എത്തിച്ചു.