പത്തനംതിട്ട: പത്തനംതിട്ടയിൽ മന്ത്രി വീണാ ജോർജിന്റെ സാന്നിധ്യത്തിൽ സി.പി.എമ്മിൽ ചേർന്നവരെ സംബന്ധിച്ചുള്ള വിവാദം ഒഴിയുന്നില്ല. കാപ്പാ, കഞ്ചാവ് കേസുകളിലെ പ്രതികളോടൊപ്പം ഒളിവിലുള്ള വധശ്രമക്കേസ് പ്രതിയും പാർട്ടിയിൽ ചേർന്നു. 
എസ്.എഫ്.ഐ പ്രവർത്തകരെ വധിക്കാൻ ശ്രമിച്ച കേസിലെ  പ്രതി സുധീഷിനെയാണ് നേതാക്കൾ മാലയിട്ട് സി.പി.എമ്മിൽ ചേർത്തത്. എസ്.എഫ്.ഐ പ്രവർത്തകരെ ആക്രമിച്ച കേസിൽ ഒന്നാംപ്രതി കാപ്പ കേസിൽ ഉൾപ്പെട്ടിട്ടുള്ള ശരൺ ചന്ദ്രനാണ്. നാലാം പ്രതിയാണ് സുധീഷ്. ശരൺ ചന്ദ്രൻ കേസിൽ ജാമ്യംനേടിയിരുന്നു. സുധീഷ് ഒളിവിലാണെന്ന് പൊലിസ് വ്യക്തമാക്കുമ്പോഴും  ശരൺ ചന്ദ്രനൊപ്പം  പാർട്ടിയിൽ ചേർന്നവരിൽ സുധീഷുമുണ്ടായിരുന്നു.

പാർട്ടിയിൽ അംഗത്വമെടുത്തതിന് പിന്നാലെ മൈലാടുപാറ സ്വദേശി യദുകൃഷ്ണനെ കുമ്പഴ ജങ്ഷനിൽ വച്ച് കഞ്ചാവ് കേസിൽ പിടികൂടിയിരുന്നു. 
കഴിഞ്ഞ അഞ്ചിനായിരുന്നു യദുകൃഷ്ണനും കാപ്പ കേസ് പ്രതി ശരൺ ചന്ദ്രനും സുധീഷുമടക്കം 62 പേർ  സി.പി.എമ്മിൽ ചേർന്നത്. ശരൺ ചന്ദ്രന് പാർട്ടി അംഗത്വം നൽകിയത് വിവാദമായതിന് പിന്നാലെ ജില്ലാ സെക്രട്ടറി കെ.പി ഉദയഭാനുവും മന്ത്രി വീണാ ജോർജും ന്യായീകരണവുമായി രംഗത്തെത്തിയിരുന്നു. കാപ്പ ചുമത്തിയാൽ ജീവിതകാലം മുഴുവൻ പ്രതിയാകില്ലെന്നാണ് ജില്ലാ സെക്രട്ടറി വിശദീകരിച്ചത്. 

അതിനിടെ, സി.പി.എമ്മിലേക്ക് പുതുതായി വന്നവര്‍ക്ക് രാഷ്ട്രീയമായി  ഒരുപാട് കേസുകളുണ്ടാകുമെന്ന് ജില്ലാ സെക്രട്ടറി കെ.പി ഉദയഭാനു പറഞ്ഞു. പാര്‍ട്ടിയിലേക്ക് വന്നവർക്കെതിരായ കേസുകള്‍ രാഷ്ട്രീയമായതാണ്. അതെല്ലാം ഒത്തുതീര്‍പ്പാക്കുമെന്നും  ഉദയഭാനു പറഞ്ഞു. ക്രിമിനൽ കേസുകൾ ഒഴിവാക്കാമെന്ന ഡീലിലാണ് കാപ്പാ കേസ് പ്രതി ഉൾപ്പെടെ സി.പി.എമ്മിൽ ചേർന്നതെന്ന് കോൺഗ്രസും ബി.ജെ.പിയും ആരോപിക്കുന്നതിനിടെയാണ് കേസുകള്‍ ഒത്തുതീര്‍പ്പാക്കുമെന്ന് സി.പി.എം ജില്ലാ സെക്രട്ടറി തന്നെ വ്യക്തമാക്കിയത്.

Murder Attempt Case Accused Also Joined in CPM Pathanamthitta