ദുബൈ: ശൈഖാ ഫാത്തിമ ബിൻത് മുബാറക് ഇൻ്റർനാഷനൽ ഹോളി ഖുർആൻ അവാർഡ് മത്സരത്തിൻ്റെ എട്ടാമത് പതിപ്പിൻ്റെ ഒരുക്കങ്ങൾ തുടങ്ങിയതായി ദുബൈ ഇൻ്റർനാഷനൽ ഹോളി ഖുർആൻ അവാർഡ് കമ്മിറ്റി പ്രഖ്യാപിച്ചു. ദുബൈ ഔഖാഫിന്റെ കീഴിലുള്ള അൽ മംസർ ഏരിയയിലെ സയന്റിഫിക് ആൻഡ് കൾചറൽ അസോസിയേഷൻ ഹാളിലാണ് സെപ്‌റ്റംബർ 7 മുതൽ 13 വരെ സ്ത്രീകൾക്കായുള്ള ഖുർആൻ മത്സരങ്ങൾ നടത്തുന്നത്. 

120ലധികം രാജ്യങ്ങളെയും വിവിധ ഖുർആനിക പ്രസ്ഥാനങ്ങളെയും പ്രതിനിധീകരിച്ചാണ് ഈ പരിപാടി ഒരുക്കുന്നതെന്ന് ദുബൈ ഭരണാധികാരിയുടെ സാംസ്കാരിക-മാനുഷിക കാര്യ ഉപദേഷ്ടാവും ദുബൈ ഇൻ്റർനാഷനൽ ഹോളി ഖുർആൻ അവാർഡ് സംഘാടക കമ്മിറ്റി ചെയർമാനുമായ കൗൺസിലർ ഇബ്രാഹിം മുഹമ്മദ് ബൂ മിൽഹ പറഞ്ഞു. ലോകമെമ്പാടുമുള്ള അനേകം പ്രഗത്ഭരാണ് മത്സരത്തിൽ പങ്കെടുക്കുക. വിശാലവും വിപുലവുമായ പങ്കാളിത്തം പ്രതീക്ഷിക്കുന്നുവെന്നും അദ്ദേഹം പറഞ്ഞു. 

ശൈഖാ ഫാത്തിമ ബിൻത് മുബാറക് ഇൻ്റർനാഷനൽ ഹോളി ഖുർആൻ മത്സരങ്ങളുടെ മുൻ സെഷനുകളുടെ വിജയവും, ഈ മേഖലയിൽ സ്ത്രീകൾക്കായുള്ള ഏറ്റവും മികച്ച അന്താരാഷ്ട്ര ഖുർആൻ മത്സരങ്ങളിലൊന്നും എന്ന നിലയിൽ ഏറെ പ്രശസ്തവും വിശിഷ്ടവുമാണിത്. യുനൈറ്റഡ് അറബ് എമിറേറ്റ്സിന്റെ മാതാവ് ശൈഖാ ഫാത്തിമ ബിൻത് മുബാറക്കിന്റെ നാമം വഹിക്കുന്ന ഈ മത്സരത്തിന് ലോകെമെങ്ങും ഖ്യാതിയുണ്ട്. വൈജ്ഞാനിക, ജീവ കാരുണ്യ, സാംസ്കാരിക മേഖലകളിൽ അളവറ്റ സംഭാവനകൾ അർപ്പിച്ച ശ്രേഷ്ഠ മഹതിയാണവർ. 
ഈ മത്സരത്തിൽ പങ്കെടുക്കുന്നതിനുള്ള വ്യവസ്ഥകൾ.  25 വയസ് കവിയരുത്. ഖുർആൻ മനഃപാഠമാക്കിയിരിക്കണം.

ഇത്തരം മഹനീയമായ മത്സരങ്ങൾക്കും സംരംഭങ്ങൾക്കും ഉദാര പിന്തുണ നൽകിയതിന് യു.എ.ഇ വൈസ് പ്രസിഡൻ്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂമിന് ബൂ മിൽഹ കൃതജ്ഞത പ്രകാശിപ്പിച്ചു. 
മംസർ സയന്റിഫിക് ആൻഡ് കൾചറൽ അസോസിയേഷൻ, ദുബൈ ജനറൽ ഡയരക്ടറേറ്റ് ഓഫ് റെസിഡൻസി ആൻഡ് ഫോറീനേഴ്സ് അഫയേഴ്സ്, റോഡ്സ് ആൻഡ് ട്രാൻസ്പോർട്ട് അതോറിറ്റി, ദുബൈ മുനിസിപ്പാലിറ്റി, നൂർ ദുബൈ ചാനൽ എന്നിവ ഈ പരിപാടിയുടെ സംഘാടകരിൽപ്പെടുന്നു. പരിപാടികൾ യൂ ട്യൂബ് പ്ലാറ്റ്‌ഫോമിൽ തത്സമയം സംപ്രേഷണം ചെയ്യും.