മലപ്പുറം: ഇരുമ്പു മറക്കുള്ളിലിരുന്നാണ് പിണറായി വിജയന്‍ കേരളം ഭരിക്കുന്നതെന്ന് യു.ഡി.എഫ് കണ്‍വീനര്‍ പി.പി തങ്കച്ചന്‍. കേന്ദ്ര സംസ്ഥാന സര്‍ക്കാറുകളുടെ ജനവിരുദ്ധ നയങ്ങള്‍ക്കെതിരേ യു.ഡി.എഫ് ജില്ലാ കമ്മിറ്റി കലക്ടറേറ്റിനു മുന്നില്‍ നടത്തിയ മാര്‍ച്ചും ധര്‍ണയും ഉദ്ഘാടനം ചെയ്യുകയായിരുന്നു അദ്ദേഹം. അധികാരത്തിലേറി ചുരുങ്ങിയ സമയം കൊണ്ട് തന്നെ ഇത്രയേറെ ജനങ്ങളുടെ എതിര്‍പ്പ് ഏറ്റുവാങ്ങിയ സര്‍ക്കാര്‍ ഇതിനു മുമ്പ് ഉണ്ടായിട്ടില്ല.
രണ്ടര മാസം കൊണ്ട്  60 കൊലപാതകങ്ങളാണ് സംസ്ഥാനത്ത് നടന്നത്. ഇത് തടയുന്നതിലോ പ്രതികളെ പിടികൂടുന്നതിലോ പൊലിസും അഭ്യന്തരവകുപ്പും വേണ്ടത്ര ജാഗ്രത കാണിക്കുന്നില്ല. സി.പി.എം അക്രമരാഷ്ട്രീയം നടത്തുമ്പോള്‍ ബി.ജെ.പി വര്‍ഗീയ രാഷ്ട്രീയമാണ് ഉപയോഗിക്കുന്നത്. ദലിത്‌സമൂഹത്തിന് പുല്ലുവില കല്‍പിച്ചാണ് കേന്ദ്ര സംസ്ഥാന  സര്‍ക്കാറുകള്‍ മുന്നോട്ട് പോകുന്നത്. ഭരണത്തിലേറിയ അന്നു മുതല്‍ അകാരണ സ്ഥലം മാറ്റം തുടരുകയാണ്. പൊതുവിതരണ മേഖല ആകെ സ്തംഭിച്ചു. നഷ്ടത്തിന്റെ കണക്കു പറഞ്ഞ് എണ്ണൂറോളം നന്മാ സ്റ്റോറുകളാണ് ഈ അടുത്തകാലത്തായി പൂട്ടിയത്. ലാഭം നേടാനല്ല ഇത്തരം സംരംഭങ്ങള്‍ സര്‍ക്കാര്‍ തുടങ്ങിയതെന്ന് അറിയാത്ത ഭാവം നടിച്ചാണ് ഇത് ചെയ്തത്. മുല്ലപെരിയാര്‍ വിഷയത്തില്‍ പിണറായി കാണിക്കുന്ന അലംഭാവത്തിന് വലിയ വിലനല്‍കേണ്ടി വരും. പുതിയ നികുതി നിയമം നടപ്പിലായതോടെ രജിസ്‌ട്രേഷന്‍ നടപടികള്‍ക്കുള്ള ഫീസ് കുത്തനെ ഉയര്‍ത്തിയതും സാധാരണക്കാര്‍ക്കു കനത്ത തിരിച്ചടിയായി.  കെ.എം മാണി യു.ഡി.എഫ് വിട്ടു പോയിട്ടും മുന്നണിയില്‍ യാതൊരു വിധ കോട്ടവും സംഭവിച്ചിട്ടില്ലെന്നും അദ്ദേഹം കൂട്ടിച്ചേര്‍ത്തു.
യു.ഡി.എഫ് ജില്ലാ കണ്‍വീനര്‍ അഡ്വ. കെ.എന്‍.എ ഖാദര്‍ അധ്യക്ഷനായി. ഘടകകക്ഷി നേതാക്കളായ ആര്യാടന്‍ മുഹമ്മദ്, ഇ മുഹമ്മദ് കുഞ്ഞി, ബിജു, അബ്രഹാം പി മാത്യു, വാസു കാരയില്‍, വെന്നിയൂര്‍ മുഹമ്മദ് കുട്ടി, അഡ്വ. യു.എ ലത്തീഫ്, സി.പി ബാവഹാജി, എന്‍ സൂപ്പി, എ.പി ഉണ്ണികൃഷ്ണന്‍, സലീം കുരുവമ്പലം, വി.വി പ്രകാശ്, എം.എല്‍.എമാരായ പി.കെ അബ്ദുറബ്ബ്, സി മമ്മൂട്ടി, അഡ്വ. എം ഉമ്മര്‍, പി ഉബൈദുല്ല, കെ.കെ ആബിദ് ഹുസൈന്‍ തങ്ങള്‍, വി.എ കരീം, അഷ്‌റഫ് കോക്കൂര്‍, എം.കെ ബാവ, പി സൈതലവി മാസ്റ്റര്‍, എം.എ ഖാദര്‍ എന്നിവര്‍ മാര്‍ച്ചിനും ധര്‍ണക്കും നേതൃത്വം നല്‍കി.