മസ്കത്ത് :മസ്കത്ത്  പഞ്ചവാദ്യസംഘത്തിന്റെ ഇരുപതാം വാർഷികാഘോഷം  മസ്കത്ത് പൂരം അൽ ഫലജ് ഹോട്ടലിൽ നടന്നു. പരിപാടി ഇന്ത്യൻ അംബാസഡർ അമിത് നാരംഗ് ഉദ്ഘാടനം ചെയ്തു, രാകേഷ് കമ്മത്ത് അവതരിപ്പിച്ച സോപാന സംഗീതത്തോടെ ഭദ്രദീപം തെളിയിച്ചു . മുവാത്തി സാലിം സൈദ് അൽ മുവാത്തി (ഡയറക്ടർ ജനറൽ മ്യുസിയം), ഡ്രമ്മർ ശിവമണി, സാമൂഹ്യ ക്ഷേമ പ്രവർത്തകൻ സന്തോഷ് ഗീവർ തുടങ്ങിയവർ ആശംസ പ്രസംഗം നടത്തി. മസ്കറ്റ് പഞ്ചവാദ്യസംഘം ഗുരു തിച്ചൂർ സുരേന്ദ്രൻ അധ്യക്ഷ പ്രസംഗത്തിൽ കലാകാരന്മാരുടെ കൂട്ടായ്മയായ മസ്കത്ത്  പഞ്ചവാദ്യസംഘത്തിന്റെ പ്രവർത്തനങ്ങളെപ്പറ്റി വിശദീകരിച്ചു കോ ഓഡിനേറ്റർ മനോഹരൻ ഗുരുവായൂർ കലാകൂട്ടായ്മയുടെ തുടക്കം മുതൽ വിശദീകരിച്ചു. രതീഷ് പട്ടിയത്ത് സ്വാഗത പ്രസംഗവും വാസുദേവൻ തളിയറ നന്ദിയും  പറഞ്ഞു.

പ്രശസ്ത പഞ്ചവാദ്യ കലാകാരൻ ആയ കുട്ടാനെല്ലൂർ രാജൻ മാരാർ കൊടിയേററം നടത്തി തുടർന്ന് നാട്ടിൽ നിന്നും എത്തിയ കലാകാരന്മാരും മസ്കത്ത്  പഞ്ചവാദ്യ സംഘാംഗങ്ങളും ചേർന്ന് കേളി, കൊമ്പ്പറ്റ്, കുഴൽപറ്റ് ,പഞ്ചവാദ്യവും നടന്നു. ശിവമണി അവതരിപ്പിച്ച ഉപകരണ സംഗീതം ഏറെ ഹൃദ്യമായി . ചൊവ്വല്ലൂർ മോഹന വാര്യരും പനങ്ങാട്ടിരി മോഹനനും പ്രമാണിമാരായി അവതരിപ്പിച്ച പഞ്ചാരിമേളം ഏവരെയും നാട്ടിലെ പൂരപ്പറമ്പിലേക്കെത്തിച്ചു.

പൂരത്തിന്റെ പ്രധാന ആകർഷണമായി നടന്ന ഘോഷയാത്രയിൽ മാമാങ്കകുതിരയും, കാള, തെയ്യം, തിറ, കരിങ്കാളി, നാടൻ പാട്ട്, നൃത്തനൃത്യങ്ങൾ , ഒമാനി കലാകാരൻമാർ അവതരിപ്പിച്ച ഒമാനി പൈതൃക ഡാൻസ് തുടങ്ങി വിവിധ കലാരൂപങ്ങൾ  ഏവരുടെയും മനം കവരുന്നതായിരുന്നു. തുടർന്ന് നടന്ന ഡിജിറ്റൽ വെടിക്കെട്ടോടുകൂടി മസ്കറ്റ് പൂരം പര്യവസാനിച്ചു. രവി പാലിശ്ശേരി , ചന്തു മിറോഷ് , ജയരാജ് മുങ്ങത്ത് , രാജേഷ് കായംകുളം , സതീഷ്‌കുമാർ, സുരേഷ് ഹരിപ്പാട്, വിജി സുരേന്ദ്രൻ, അനിത രാജൻ തുടങ്ങിയവർ പരിപാടികൾ നിയന്ത്രിച്ചു.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക