തിരുവനന്തപുരം: നടന്‍ ജയസൂര്യക്കെതിരെ ലൈംഗികാതിക്രമത്തിന് വീണ്ടും കേസ്. തിരുവനന്തപുരം സ്വദേശിയായ നടിയുടെ പരാതിയിലാണ് കേസ്. 

2013ല്‍ തൊടുപുഴയിലെ ഷൂട്ടിങ് ലൊക്കേഷനില്‍വെച്ച് ജയസൂര്യ കടന്നു പിടിച്ചെന്നാണ് പരാതി. കരമന പൊലിസ് സ്റ്റേഷനിലാണ് പരാതി നല്‍കിയത്. പരാതി തൊടുപുഴ പൊലിസിന് കൈമാറി. നടിയുടെ പ്രാഥമിക മൊഴി പൊലിസ് രേഖപ്പെടുത്തി. ഷൂട്ടിങ് സൈറ്റില്‍ വെച്ച് തന്നെ കടന്നുപിടിച്ച് ചുംബിച്ചെന്ന് നടി മൊഴി നല്‍കി.

കൊച്ചി സ്വദേശിനിയുടെ പരാതിയില്‍ ജയസൂര്യക്കെതിരെ കേസെടുത്തിരുന്നു. തിരുവനന്തപുരം കന്റോണ്‍മെന്റ് പൊലിസ് ജാമ്യമില്ലാ വകുപ്പടക്കം ചേര്‍ത്താണ് കേസെടുത്തിരുന്നത്. സിനിമാ മേഖലയിലെ ലൈംഗികാതിക്രമ പരാതികള്‍ അന്വേഷിക്കുന്ന പ്രത്യേക സംഘം നടിയുടെ മൊഴി രേഖപ്പെടുത്തുകയും ചെയ്തിട്ടുണ്ട്.