അബൂദബി: ഗസ്സയിൽ പോളിയോ വൈറസ് സാഹചര്യം വീണ്ടും കണ്ടെത്തിയതിനെ തുടർന്ന് നിർണായക പോളിയോ വാക്സിനേഷൻ യജ്‌ഞം നടത്താനുള്ള ധനസഹായത്തിന് യു.എ.ഇ പ്രസിഡൻ്റ് ശൈഖ് മുഹമ്മദ് ബിൻ സായിദ് അൽ നഹ്‌യാൻ നിർദേശം നൽകി. 5 മില്യൺ യു.എസ് ഡോളറാണ് ഈയാവശ്യത്തിന് യു.എ.ഇ വിനിയോഗിക്കുക.  ലോകാരോഗ്യ സംഘടന, യൂനിസെഫ്, യു.എൻ.ആർ.ഡബ്ല്യു.എ എന്നിവയുടെ സഹകരണത്തോടെ നടത്തുന്ന രണ്ട് റൗണ്ട് കാംപയിനിൽ 10 വയസിന് താഴെയുള്ള 640,000 ഗസ്സയിലെ കുട്ടികൾക്ക് രണ്ട് ഡോസ് പോളിയോ വാക്‌സിൻ നൽകും. 

നാളെ മധ്യ ഗസ്സയിൽ നിന്നാരംഭിച്ച് തെക്കൻ-വടക്കൻ ഗസ്സയിലേക്കും കാംപയിൻ വ്യാപിപ്പിക്കും. ഓരോ ഏരിയകൾ കേന്ദ്രീകക്കുള്ള ഈ മാനുഷിക സംരംഭം മൂന്നു ദിവസം തുടരുന്നതാണ്. കുട്ടികൾക്കും കുടുംബങ്ങൾക്കും ആരോഗ്യ സൗകര്യങ്ങൾ ലഭ്യമാക്കാൻ സാമൂഹിക പ്രവർത്തകരെ ബന്ധിപ്പിക്കും. 

വിതരണത്തിനുള്ള തയാറെടുപ്പിനായി ഏകദേശം 1.26 ദശലക്ഷം പോളിയോ വാക്സിൻ ഗസ്സയിൽ എത്തിച്ചിട്ടുണ്ട്. 4,00,000 ഡോസുകൾ ഉടൻ എത്തും. മൊബൈൽ ടീമുകൾ ഉൾപ്പെടെ 2,100ലധികം ആരോഗ്യ പ്രവർത്തകർ കാംപയിനിന്റെ രണ്ട് റൗണ്ടുകളും ഡെലിവറിക്ക് പിന്തുണ നൽകും. പോളിയോ പടരുന്നത് തടയാൻ ഓരോ റൗണ്ടിലും കുറഞ്ഞത് 90 ശതമാനം വാക്സിനേഷൻ കവറേജ് ആവശ്യമാണ്, ഗസ്സയ്ക്കുള്ളിലെ തിരക്ക്, സ്ഥലം മാറ്റം, ആരോഗ്യം, വെള്ളം, ശുചീകരണ സംവിധാനങ്ങൾ എന്നിവ ഗുരുതരമായി തടസ്സപ്പെട്ട സാഹചര്യമാണ് ഇപ്പോഴത്തേത്. 

2024 ജൂലൈയിൽ ഗസ്സയിൽ പോളിയോ വൈറസ് ആദ്യമായി കണ്ടെത്തിയതിനെ തുടർന്നാണ് കാംപയിൻ ആരംഭിച്ചത്. ലോകാരോഗ്യ സംഘടന ഓഗസ്റ്റ് 23ന് ഗസ്സയിലെ ഒരു കുട്ടിക്കെങ്കിലും ടൈപ്പ് 2 പോളിയോ വൈറസ് ബാധിച്ചിട്ടുണ്ടെന്ന് സ്ഥിരീകരിച്ചു. ഇത് 25 വർഷത്തിനിടെ ഈ പ്രദേശത്ത് ആദ്യമായിട്ടാണ്.  ശൈഖ് മുഹമ്മദിന്റെ നിർദേശ പ്രകാരം യു.എ.ഇ ഗസ്സയിലെ മാനുഷിക പ്രവർത്തനങ്ങളിൽ മുൻപന്തിയിലാണ്. ഭക്ഷണം, വൈദ്യ സഹായം, പാർപ്പിട സാമഗ്രികൾ എന്നിവയുൾപ്പെടെ 40,000 ടണ്ണിലധികം അടിയന്തര സാധനങ്ങൾ യു.എ.ഇ അവിടെ എത്തിച്ചു കഴിഞ്ഞിട്ടുണ്ട്. 

ഈജിപ്തിലെ തുറമുഖമായ അൽ അരീഷിൽ ഫ്ലോട്ടിങ് ഹോസ്പിറ്റലിനൊപ്പം തെക്കൻ ഗസ്സയിൽ യു.എ.ഇ ഒരു ഫീൽഡ് ഹോസ്പിറ്റലും സ്ഥാപിച്ചിട്ടുണ്ട്. പരുക്കേറ്റ 27,000 ഫലസ്തീനികൾക്ക് കൂട്ടായ പരിശ്രമ ഫലമായി വൈദ്യസഹായം നൽകി. യു.എ.ഇയിലെ ആശുപത്രികളിൽ 1,000ത്തിലധികം പലസ്തീൻ കുട്ടികൾക്കും 1,000 കാൻസർ രോഗികൾക്കും ചികിത്സ നൽകാൻ മറ്റൊരു സംരംഭത്തിലൂടെയും യു.എ.ഇ ശ്രമിക്കുന്നു. 

ജലവും ഭക്ഷ്യ സുരക്ഷയും ഉറപ്പു വരുത്തുന്നതിനായി യു.എ.ഇ ഈജിപ്തിലെ റഫയിൽ പ്രതിദിനം 1.6 ദശലക്ഷം ഗാലൻ ശേഷിയുള്ള ആറ് ജല ഡീസാലിനേഷൻ പ്ലാൻ്റുകൾ സ്ഥാപിച്ചു. ഇത് 600,000 ഗസ്സക്കാർക്ക് വെള്ളം വിതരണം ചെയ്യുന്നു.