ന്യൂഡല്‍ഹി: ക്രിമിനല്‍ കേസ് പ്രതികളുടേതാണെന്ന് കരുതി എങ്ങനെയാണ് വീട് പൊളിച്ച് കളയാനാവുക? ബുള്‍ഡോസര്‍ രാജ് നടപടിക്കെതിരേ ചോദ്യവുമായി സുപ്രീംകോടതി. പ്രതിയെന്ന് സംശയിക്കുന്ന ആളുടെയോ കുറ്റക്കാരന്റെയോ പോലും വീട് പൊളിക്കാനാവില്ല. നിയമ വിരുദ്ധ നിര്‍മ്മാണങ്ങള്‍ മാത്രമേ പൊളിച്ചു നീക്കാവൂ. ഇക്കാര്യത്തില്‍ മാര്‍ഗനിര്‍ദ്ദേശം പുറത്തിറക്കുമെന്നും കോടതി വ്യക്തമാക്കി.ജസ്റ്റിസ് ബി ആര്‍ ഗവായ്, ജസ്റ്റിസ് കെ വി വിശ്വനാഥന്‍ എന്നിവരുടെ ബെഞ്ചാണ് ഇക്കാര്യം വ്യക്തമാക്കിയത്. 

ഡല്‍ഹി ജഹാംഗീര്‍പുരിയിലെ പൊളിക്കല്‍ നടപടി ചൂണ്ടിക്കാട്ടി മുതിര്‍ന്ന അഭിഭാഷകരായ ദുഷ്യന്ത് ദവെയും സി യു സിങ്ങും ആണ് കോടതിയെ സമീപിച്ചത്. വീടിന്റെ ഉടമയുടെ മകനോ വാടകക്കാരനോ ഉള്‍പ്പെട്ട കേസില്‍പ്പോലും വീടുകള്‍ തകര്‍ത്തെന്ന് ഇരു അഭിഭാഷകരും ചൂണ്ടിക്കാട്ടി.രാജ്യത്തുടനീളം 'ബുള്‍ഡോസര്‍ നീതി' നടപ്പാക്കുന്നില്ലെന്ന് ഉറപ്പാക്കാന്‍ കോടതിയുടെ നിര്‍ദേശം തേടി. 

അതേസമയം വിഷയം കോടതിക്ക് മുന്നില്‍ തെറ്റായി അവതരിപ്പിക്കുകയാണെന്ന് സോളിസിറ്റര്‍ ജനറല്‍ തുഷാര്‍ മേത്ത വാദിച്ചു. എന്നാല്‍ നിയമവിരുദ്ധ നിര്‍മാണം ആണെങ്കില്‍പ്പോലും ആദ്യം നോട്ടീസ് നല്‍കണമെന്ന് ബെഞ്ച് വ്യക്തമാക്കി. 

മറുപടി നല്‍കാനും നിയമപരമായ പരിഹാരങ്ങള്‍ തേടാനും സമയം നല്‍കണം. എന്നിട്ടേ നിര്‍മാണം പൊളിക്കുന്നതിലേക്ക് കടക്കാവൂ. ഇത്തരം പൊളിക്കലിന് കൃത്യമായ നടപടി ക്രമങ്ങള്‍ വേണം. അനധികൃത നിര്‍മാണങ്ങളെ ഒരു തരത്തിലും സംരക്ഷിക്കില്ലെന്നും കോടതി വ്യക്തമാക്കി.

Supreme Court Ruling Against Bulldozer Raj: How to Address Misuse of Demolition"