തിരുവനന്തപുരം: അര്‍ജന്റീന ടീമിനെ കേരളത്തിലേക്ക് ക്ഷണിക്കാന്‍ കായികമന്ത്രി വി.അബ്ദുറഹ്മാന്‍ നാളെ സ്‌പെയിനിലേക്ക്.  അര്‍ജന്റീന ടീം പ്രതിനിധികളുമായി മാഡ്രിഡില്‍ ചര്‍ച്ച നടത്തും. സ്‌പോര്‍ട്‌സ് വകുപ്പ് ഡയറക്ടറും സ്‌പോര്‍ട്‌സ് സെക്രട്ടറിയും മന്ത്രിക്കൊപ്പം സ്‌പെയിനിലേക്ക് പോകും. 

2024 ജനുവരിയില്‍ കേരളത്തില്‍ കളിക്കാന്‍ സന്നദ്ധത അറിയിച്ച് അര്‍ജന്റീന ഫുട്‌ബോള്‍ ടീം ഇ മെയില്‍ സന്ദേശമയച്ചതായി കായികമന്ത്രി വ്യക്തമാക്കിയിരുന്നു. 2025 ഒക്ടോബറില്‍ അര്‍ജന്റീന ഫുട്‌ബോള്‍ ടീം കേരളത്തിലെത്താന്‍ സന്നദ്ധത അറിയിച്ചെന്നാണ് അന്ന് മന്ത്രി പറഞ്ഞത്.

അര്‍ജന്റീന ദേശീയ ടീം ഇന്ത്യയില്‍ കളിക്കാന്‍ ആഗ്രഹം പ്രകടിപ്പിച്ചെങ്കിലും ഭീമമായ ചിലവ് താങ്ങാന്‍ കഴിയില്ലെന്ന കാരണത്താല്‍ ഇന്ത്യ ആ അവസരം നഷ്ടപ്പെടുത്തി എന്ന വാര്‍ത്ത കേരളത്തിലെ ഫുട്ബാള്‍ പ്രേമികളില്‍ പ്രത്യേകിച്ചും നീലപ്പടയുടെ ആരാധകരില്‍ സൃഷ്ടിച്ച നിരാശയാണ് അര്‍ജന്റീന ടീമിനെ കേരളത്തിലേക്ക് ക്ഷണിക്കാനുള്ള പ്രേരണ നല്‍കിയത്. ഖത്തര്‍ ലോകകപ്പ് സമയത്ത് നീലക്കടലായി മാറിയ കേരളത്തോടുള്ള ഇഷ്ടം പ്രകടിപ്പിച്ചു കൊണ്ട് കേരളത്തിന്റെ ക്ഷണം അവര്‍ സ്വീകരിച്ചുവെന്ന് മന്ത്രി വ്യക്തമാക്കിയിരുന്നു. 

സൗഹൃദ മത്സരത്തിന്റെ സാധ്യതകളും കേരളത്തിന്റെ ഫുട്‌ബോള്‍ വികസനത്തില്‍ അര്‍ജന്റീനയുമായി സഹകരിക്കാവുന്ന വിവിധ തലങ്ങളും അര്‍ജന്റീന ഫുട്‌ബോള്‍ അസോസിയേഷന്‍ പ്രതിനിധികളുമായി ഓണ്‍ലൈന്‍ മീറ്റിംഗില്‍ വിശദമായി ചര്‍ച്ച ചെയ്‌തെന്നും മന്ത്രി പറഞ്ഞിരുന്നു.

Kerala's Sports Minister is set to travel to Spain to extend an official invitation to the Argentina football team to play a friendly match in Kerala, aiming to boost the state's sports and tourism sectors.