തുബാസ് (വെസ്റ്റ്ബാങ്ക്): വെസ്റ്റ്ബാങ്കില്‍ ഇസ്‌റാഈല്‍ വ്യോമാക്രമണത്തില്‍ അഞ്ചുപേര്‍ കൊല്ലപ്പെട്ടു. തുബാസ് നഗരത്തിലാണ് ആക്രമണം. അഞ്ചു പേരുടെ മൃതദേഹങ്ങള്‍ കണ്ടെടുത്തതായും ആശുപത്രിയിലേക്ക് മാറ്റിയതായും ഫലസ്തീന്‍ റെഡ്ക്രസന്റ് അറിയിച്ചു. ആക്രമണ വിവരം ഇസ്‌റാഈല്‍ സൈന്യവും സ്ഥിരീകരിച്ചിട്ടുണ്ട്. ഇസ്‌റാഈല്‍ വ്യോമസേനയാണ് ആക്രമണം നടത്തിയതെന്നാണ് ഇസ്‌റാഈല്‍ അവകാശപ്പെടുന്നത്.

തുബാസിലെ റോഡുകളില്‍ കിടങ്ങുകീറിയും മറ്റും സൈന്യം തടസപ്പെടുത്തിയിട്ടുണ്ട്. ജോര്‍ദാനുമായി അതിര്‍ത്തി പങ്കിടുന്ന വടക്കന്‍ മേഖലയിലാണ് ഈ പ്രദേശം. കഴിഞ്ഞ രണ്ടാഴ്ചയായി വടക്കന്‍ വെസ്റ്റ്ബാങ്കില്‍ ഇസ്‌റാഈല്‍ സേന തുടര്‍ച്ചയായി ആക്രമണം നടത്തുന്നുണ്ട്. തുബാസ്, ജെനിന്‍, തുല്‍കരീം നഗരങ്ങളിലാണ് ആക്രമണം നടക്കുന്നത്. ഇവിടങ്ങളില്‍ ഇസ്‌റാഈല്‍ സൈന്യവും ഫലസ്തീന്‍ സായുധ സേനാംഗങ്ങളും തമ്മില്‍ ഏറ്റുമുട്ടലുണ്ടായെന്ന് റോയിട്ടേഴ്‌സ് റിപ്പോര്‍ട്ട് ചെയ്തു.