മലപ്പുറം: സിപിഎമ്മിന്റെ മുന്‍ സംസ്ഥാന സെക്രട്ടറിയായിരുന്ന കോടിയേരി ബാലകൃഷ്ണന് അര്‍ഹിച്ച അന്ത്യയാത്ര നല്‍കിയില്ലെന്ന് പിവി അന്‍വര്‍ എംഎല്‍എ. കോടിയേരിയുടെ സംസ്‌കാരം നേരത്തെയാക്കിയത് മുഖ്യമന്ത്രിയുടെയും, കുടുംബത്തിന്റെയും യൂറോപ്യന്‍ യാത്രക്ക് വേണ്ടിയാണെന്ന് കണ്ണൂരില്‍ നിന്നുള്ള ഒരു സഖാവ് തന്നോട് പറഞ്ഞെന്നും അന്‍വര്‍ പറഞ്ഞു. കോടിയേരിയുണ്ടായിരുന്നെങ്കില്‍ ഇപ്പോഴത്തെ പ്രശ്‌നങ്ങള്‍ ഉണ്ടാകില്ലായിരുന്നെന്നും അന്‍വര്‍ പറഞ്ഞു. 

'കണ്ണൂരിലെ ഒരു സഖാവ് എനിക്ക് മെസേജ് അയച്ചിരുന്നു. ഞങ്ങളുടെ പ്രിയപ്പെട്ട നേതാവായിരുന്നു കോടിയേരി. ആ മനുഷ്യന്റെ മരണം നടന്നിട്ട് തിരുവനന്തപുരം എകെജി സെന്ററില്‍ ഭൗതികശരീരം കൊണ്ടുപോയി വെച്ചില്ല. കേരളത്തിലുടനീളമുള്ള സഖാക്കള്‍ അതിനായി കാത്തിരുന്നതാണ്. ഒരു നേരത്തെ യാത്രയപ്പിന് കൈ ഉയര്‍ത്തി ഇന്‍ക്വിലാബ് വിളിക്കാന്‍ കാത്തിരുന്ന ലക്ഷക്കണക്കിന് സഖാക്കളുണ്ടായിരുന്നു തിരുവനന്തപുരം മുതല്‍ കണ്ണൂര്‍ വരെ. ഞങ്ങള്‍ക്കാര്‍ക്കും കാണിച്ച് തന്നില്ല. അതിനുള്ള സാഹചര്യം ഒരുക്കിയില്ല. ചെന്നൈയില്‍ നിന്നും നേരെ കണ്ണൂരിലെത്തിച്ചു. പിറ്റേന്ന് സംസ്‌കാരം നടത്തി. ഇത് അന്ന് വൈകീട്ട് മുഖ്യമന്ത്രിക്കും കുടുംബത്തിനും യൂറോപിലേക്ക് പോകാനായി ചെയ്തതാണ് എന്നതാണ് കണ്ണൂരിലെ സഖാവിന്റെ സന്ദേശം' അന്‍വര്‍ പറഞ്ഞു.

Kotiyeris cremation was done earlier for the Chief Minister and his family to travel abroad says PV Anwar MLA