തെഹ്‌റാന്‍: ഇസ്‌റാഈലിന് അതിരൂക്ഷമായ തിരിച്ചടി നല്‍കാന്‍ ഇറാന്‍ തയ്യാറെടുക്കുന്നതായി റിപ്പോര്‍ട്ട്. ഇതിനായി ദീര്‍ഘദൂര ഡ്രോണുകളും ബാലിസ്റ്റിക് മിസൈലുകളും ഇറാന്‍ സജ്ജമാക്കുന്നെന്ന് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്യുന്നു. ഇറാഖ് കേന്ദ്രീകരിച്ചാണ് ഇറാന്‍ ആക്രമണം നടത്താന്‍ പദ്ധതിയിടുന്നതെന്നും റിപ്പോര്‍ട്ടുകള്‍ വ്യക്തമാക്കുന്നു. ഇറാഖിന്റെ സൈനിക കേന്ദ്രങ്ങളില്‍ നിന്നായിരിക്കും ആക്രമണമുണ്ടാവുക. 

ഇരാഖിലെ ഇറാന്‍ അനുകൂല കേന്ദ്രങ്ങളില്‍ നിന്ന് ആക്രമണം നടത്താന്‍ തീരുമാനിച്ചത് ഇറാന് നേരെ ഇസ്‌റാഈലിന്റെ മറ്റൊരു ആക്രമണം എഴിവാക്കാനാണെന്നും അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്യുന്നു. 

ഈ മാസം അഞ്ചാം തീയതിക്ക് മുമ്പ് ആക്രമണം നടത്താനാണ് തീരുമാനം. ഇസ്‌റാഈലിന്റെ പ്രധാന നഗരങ്ങളും തന്ത്രപ്രധാന കേന്ദ്രങ്ങളുമാണ് ഇറാന്‍ ലക്ഷ്യം വെക്കുന്നതെന്നും ഇസ്‌റാഈല്‍ ഇന്റലിജന്‍സ് പുറത്തു വിട്ട റിപ്പോര്‍ട്ടിലുണ്ട്. 

അടുത്തിടെ സയണിസ്റ്റ് ഭരണകൂടം ഞങ്ങളുടെ രാജ്യത്തിന് നേരെ നടത്തിയ ആക്രമണം അനുവദിക്കാനാവാത്തതായിരുന്നു. ഇതിന് ഇറാന്‍ തക്കതായ തിരിച്ചടി നല്‍കും- ഇറാന്‍ പരമോന്നത നേതാവിന്റെ അടുത്ത അനുയായിയായ മുഹമ്മദ് മുഹമ്മദി പറഞ്ഞു. 

അതിനിടെ ഗസ്സയില്‍ ഇസ്‌റാഈല്‍ നരവേട്ട തുടരുകയാണ്. കഴിഞ്ഞ ദിവസം നടത്തിയ ബോംബാക്രമണത്തില്‍  46 ഫലസ്തീനികള്‍ കൊല്ലപ്പെട്ടതായാണ് റിപ്പോര്‍ട്ട്. വടക്കന്‍ ഗസ്സയിലെ കമല്‍ അദ്‌വാന്‍ ആശുപത്രിക്ക് നേരെയും ഇസ്‌റാഈല്‍ ആക്രമണമുണ്ടായി. ആശുപത്രികെട്ടിടം പൂര്‍ണമായും തകര്‍ന്നു. ഇതോടെ മരുന്നുകളും മറ്റുമില്ലാത്തത് ജനങ്ങളെ കൂടുതല്‍ ദുരിതത്തിലാക്കിയിരിക്കുകയാണ്.