നമുക്ക് ഒഴിച്ചുകൂടാനാവാത്ത ഒന്നാണ് ഉള്ളികള്‍. പ്രത്യേകിച്ച് വലിയുള്ളിയും ചെറിയുള്ളിയുമൊക്കെ കറികളില്‍ നമ്മള്‍ ധാരാളമായി ഉപയോഗിക്കുന്നവരാണ്. മാത്രമല്ല ബിരിയാണിയും ഇറച്ചിക്കറിയ്ക്കുമൊക്കെ കുറച്ചധികം ഉള്ളി അരിയേണ്ടിയും വരും.  ഈ ഉള്ളി അരിയുമ്പോള്‍ കണ്ണുനീര്‍ വരാറുണ്ട്. കണ്ണെരിഞ്ഞ് നമ്മള്‍ പാടുപെടും. എന്നാല്‍ ഇനി കണ്ണെരിയാതെ എങ്ങനെ എളുപ്പവഴിയില്‍  സവാള അരിയാമെന്നു നോക്കാം. 

എന്തുകൊണ്ടാണ് ഉള്ളി അരിയുമ്പോള്‍ കണ്ണെരിയുന്നത്. ഉള്ളിയിലടങ്ങിയിട്ടുള്ള സള്‍ഫര്‍ സംയുക്തങ്ങളാണ് ഇതിനു കാരണം.  അതായത് മൂന്ന് ലെയറുകളിലായാണ് സവാളയുള്ളത്. ഇതില്‍ അവസാനത്തെ തൊലി മുറിക്കുമ്പോ സവാളയില്‍ നിന്നും എന്‍സൈം പുറന്തള്ളുമ്പോള്‍ ഇത് ഗ്യാസ് രൂപത്തിലാവുന്നു. ഈ ഗ്യാസ് നമ്മുടെ കണ്ണുനീര്‍ ഗ്രന്ഥികളില്‍ തട്ടുകയും കണ്ണെരിഞ്ഞ് വെള്ളം വരുകയുമാണ് ചെയ്യുന്നത്. 

ഒരു പാത്രത്തില്‍ കുറച്ച് വെള്ളമെടുത്ത് ആപ്പില്‍ സൈഡര്‍ വിനഗര്‍ ചേര്‍ത്ത് കുറച്ച് ഉപ്പുമിട്ട് നന്നായി മിക്‌സ് ചെയ്ത് വയ്ക്കുക. ഇതിലേക്ക് സവാള രണ്ടായി മുറിച്ചിടുക. 10 മിനിറ്റ് വയ്ക്കുക. ശേഷം അരിഞ്ഞാല്‍ കണ്ണെരിയുന്നതല്ല. 

കട്ടിങ് ബോഡില്‍ അല്‍പം വിനാഗിരി പുരട്ടി വച്ച് അരിയുന്നതും കണ്ണെരിയുന്നത് തടയാന്‍ നല്ലതാണ്.

 
സവാള എടുത്ത് തൊലികളയുമ്പോള്‍ അതിന്റെ വേരു കളയാതെ തൊലികളയുക. കഴുകിയ ശേഷം ഈ വേര് മുകളിലേക്ക് വരുന്ന രീതിയില്‍ വച്ച് മുകളില്‍ നിന്ന് കത്തികൊണ്ട് താഴേക്ക് വരയിടുക. എന്നിട്ട് താഴെ നിന്ന് അരിയുക. നല്ല രീതിയില്‍ തന്നെ കണ്ണെരിയാതെ നമുക്ക് ഇത് ചെയ്യാവുന്നതാണ്. 

ഇനി തണുപ്പിച്ചതിനു ശേഷവും സവാള അരിയുന്നത് കണ്ണെരിയുന്നത് കുറയ്ക്കും. അതായത് സവാള ഫ്രീസറില്‍ വച്ചാല്‍ കണ്ണുനീര്‍ വരാതെ അരിഞ്ഞെടുക്കാം. വെള്ളത്തില്‍ കഷണങ്ങളാക്കിയിട്ടും അരിയാവുന്നതാണ്.