നീണ്ട 27 വർഷത്തെ കാത്തിരിപ്പ് അവസാനിപ്പിച്ചുകൊണ്ട് സൗത്ത് ആഫ്രിക്ക ഐസിസി കിരീടം നേടിയിരിക്കുകയാണ്. വേൾഡ് ടെസ്റ്റ് ചാമ്പ്യൻഷിപ്പിന്റെ ഫൈനൽ പോരാട്ടത്തിൽ ഓസ്‌ട്രേലിയയെ അഞ്ചു വിക്കറ്റിന് വീഴ്ത്തിയാണ് സൗത്ത് ആഫ്രിക്ക തങ്ങളുടെ ചരിത്രത്തിലെ രണ്ടാം ഐസിസി കിരീടം സ്വന്തമാക്കിയത്.  

അവസാനമായി 1998 ഐസിസി ചാമ്പ്യൻസ് ട്രോഫി ആയിരുന്നു സൗത്ത് ആഫ്രിക്ക നേടിയിരുന്നത്. ഇതിനുശേഷം ഒരു കിരീടം പോലും സ്വന്തമാക്കാൻ സൗത്ത് ആഫ്രിക്കക്ക് സാധിച്ചിരുന്നില്ല. മത്സരത്തിൽ എയ്ഡൻ മാക്രമിന്റെ സെഞ്ച്വറിയും ക്യാപ്റ്റൻ ടെംമ്പ ബവുമയുടെ അർദ്ധ സെഞ്ച്വറിയുമാണ്‌ സൗത്ത് ആഫ്രിക്കയെ അനായാസം വിജയത്തിലെത്തിച്ചത്.

ഫൈനൽ പോരാട്ടത്തിൽ സൗത്ത് ആഫ്രിക്കൻ ബൗളിംഗ് നിരയിൽ മിന്നും പ്രകടനം കാഴ്ചവെച്ച കാഗിസോ റബാഡയും സൗത്ത് ആഫ്രിക്കയുടെ കിരീട നേട്ടത്തിൽ നിർണായകമായ പങ്കാണ് വഹിച്ചത്. ഇപ്പോൾ റബാഡയുടെ ഈ മികച്ച പ്രകടനങ്ങളെക്കുറിച്ച് സംസാരിക്കുകയാണ് മുൻ ഇംഗ്ലണ്ട് താരം മൈക്കൽ വോൺ. റബാഡയെ ലോകത്തിലെ ഏറ്റവും മികച്ച ബൗളർ എന്നാണ് വോൺ വിശേഷിപ്പിച്ചത്. 

"നമ്മൾ മനസ്സിലാക്കേണ്ട ഒരു കാര്യം എന്തെന്നാൽ, സൗത്ത് ആഫ്രിക്കയിൽ കാഗിസോ റബാഡയുണ്ട്. അദ്ദേഹം ഓസ്‌ട്രേലിയയുടെ ബലഹീനതകളെ മികച്ച രീതിയിൽ മുതലെടുത്ത ഒരു ലോകോത്തര ബൗളറാണ്. ലോകത്തിലെ ഏറ്റവും മികച്ച ബൗളർമാരുടെ പട്ടികയിൽ പാറ്റ് കമ്മിൻസിനൊപ്പവും ബുംറക്ക് തൊട്ടുതാഴെയും ഞാൻ റബാഡയെ ഉൾപ്പെടുത്തും. ഇംഗ്ലണ്ടിൽ നിന്നും ഈ പട്ടികയിൽ ഉൾപ്പെടുത്താൻ കഴിയുന്ന ഒരു ബൗളറും ഇല്ല'' മൈക്കൽ വോൺ തന്റെ ഫോക്സ് സ്പോർട്സ് കോളത്തിൽ എഴുതി. 

മത്സരത്തിൽ രണ്ട് ഇന്നിങ്‌സുകളിൽ നിന്നും ഒമ്പത് വിക്കറ്റുകളാണ്‌ റബാഡ വീഴ്ത്തിയത്. ആദ്യ ഇന്നിങ്സിൽ അഞ്ചു വിക്കറ്റും രണ്ടാം ഇന്നിങ്സിൽ നാല് വിക്കറ്റുമാണ് താരം നേടിയത്. ഐസിസി ടെസ്റ്റ് ബൗളർമാരുടെ റാങ്കിംഗിൽ നിലവിൽ രണ്ടാം സ്ഥാനത്താണ് റബാഡ. 71 ടെസ്റ്റുകളിൽ നിന്ന് 336 വിക്കറ്റുകളാണ് റബാഡ നേടിയത്. 

Former England player Michael Vaughan has spoken out in praise of South African pacer Kagiso Rabada