ലോകം കൂടുതൽ അസ്ഥിരമാകുന്ന ഈ വേളയിൽ, ഒമ്പത് ആണവായുധ രാജ്യങ്ങൾ ശക്തമായ ബോംബുകളും ദീർഘദൂര മിസൈലുകളും നിർമ്മിക്കുന്നതിന്റെ തിരക്കിലാണെന്ന് സ്റ്റോക്ക്ഹോം ഇന്റർനാഷണൽ പീസ് റിസർച്ച് ഇൻസ്റ്റിറ്റ്യൂട്ടിന്റെ (SIPRI) ഞെട്ടിക്കുന്ന റിപ്പോർട്ട് പുറത്ത്. തിങ്കളാഴ്ച പുറത്തിറങ്ങിയ SIPRI വാർഷിക റിപ്പോർട്ട്, ആണവ മത്സരത്തിന്റെ പുതിയ ഘട്ടത്തിലേക്ക് ലോകം കടക്കുന്നതിന്റെ ആശങ്കാജനകമായ ചിത്രം വരച്ചുകാട്ടുന്നു.

അമേരിക്ക, റഷ്യ, യുണൈറ്റഡ് കിംഗ്ഡം, ഫ്രാൻസ്, ചൈന, ഇന്ത്യ, പാകിസ്ഥാൻ, ഉത്തരകൊറിയ, ഇസ്റഈൽ എന്നീ രാജ്യങ്ങൾ തങ്ങളുടെ ആണവ ശേഖരം വർധിപ്പിക്കാനുള്ള ശ്രമത്തിലാണ്. പഴയ ആണവ യുദ്ധമുനകൾ നീക്കം ചെയ്യുന്നതിനാൽ മൊത്തം എണ്ണം കുറയുന്നുണ്ടെങ്കിലും, പുതിയതും ശക്തവുമായ യുദ്ധമുനകൾ ശേഖരത്തിലേക്ക് എത്തുന്നുണ്ട്. ആണവ നിയന്ത്രണ കരാറുകളുടെ അഭാവം ഈ പ്രവണതയെ കൂടുതൽ വഷളാക്കുന്നുവെന്ന് SIPRI മുന്നറിയിപ്പ് നൽകുന്നു.

“നാം ഒരു വലിയ മാറ്റത്തിന്റെ നടുവിലാണ്. മഹാമാരിക്ക് മുമ്പ് തന്നെ ഇത് തുടങ്ങിയിരുന്നു,” SIPRI ഡയറക്ടർ ഡാൻ സ്മിത്ത് അൽ ജസീറയോട് വ്യക്തമാക്കി. “എല്ലാ ആണവ രാജ്യങ്ങളും തങ്ങളുടെ ആയുധ ശേഖരം ആധുനികവൽക്കരിക്കുന്നു. ഇതിൽ ഇന്ത്യയും പാകിസ്ഥാനും ഉത്തരകൊറിയയും ഉൾപ്പെടുന്നു.

ആണവ രാജ്യങ്ങളുടെ നീക്കങ്ങൾ

ചൈന: വടക്കൻ മരുഭൂമിയിലും പർവതങ്ങളിലും 350 പുതിയ മിസൈൽ സിലോകൾ നിർമ്മിക്കുന്നു. കഴിഞ്ഞ വർഷം 100 യുദ്ധമുനകൾ കൂട്ടിച്ചേർത്ത് മൊത്തം 600 ആയി. മിസൈലുകളിൽ യുദ്ധമുനകൾ സ്ഥാപിക്കാനുള്ള നയം മാറ്റുന്നതിന്റെ സൂചനയും.

ഇന്ത്യ: ചൈനയെ ലക്ഷ്യമിട്ട് ദീർഘദൂര മിസൈലുകൾ വികസിപ്പിക്കുന്നു. മിസൈലുകളിൽ യുദ്ധമുനകൾ വിന്യസിക്കാനുള്ള നീക്കവും ആരംഭിച്ചു.

പാകിസ്ഥാൻ: ഫിസൈൽ വസ്തുക്കൾ ശേഖരിക്കുന്നു. അടുത്ത ദശകത്തിൽ ആണവ ശേഖരം വർധിക്കുമെന്ന് കണക്കാക്കുന്നു.

ഉത്തരകൊറിയ: 40 പുതിയ ബോംബുകൾ നിർമ്മിക്കാൻ കഴിയുന്ന വസ്തുക്കൾ ശേഖരിച്ചു. തന്ത്രപരമായ ആണവ മിസൈലുകൾ വിക്ഷേപിക്കാനുള്ള ഒരുക്കത്തിൽ.

യുകെ: യുദ്ധമുനകളുടെ എണ്ണം 225 ൽ നിന്ന് 260 ആയി ഉയർത്തി. പുതിയ ഡ്രെഡ്‌നോട്ട് ക്ലാസ് അന്തർവാഹിനികൾ നിർമ്മിക്കുന്നു.

ഫ്രാൻസ്: മൂന്നാം തലമുറ അന്തർവാഹിനിയും ആണവ ശേഷിയുള്ള ക്രൂയിസ് മിസൈലുകളും വികസിപ്പിക്കുന്നു.

ഇസ്റഈൽ: അന്തർവാഹിനികളിൽ നിന്ന് ആണവ മിസൈലുകൾ വിക്ഷേപിക്കാൻ ശേഷിയുണ്ടെന്ന് കരുതുന്നു.

റഷ്യ, യുഎസ്: ലോക ആണവ ശേഖരത്തിന്റെ 90% ഇവർ കൈവശം വച്ചിരിക്കുന്നു. ഇരുരാജ്യങ്ങളും മിസൈലുകൾ, അന്തർവാഹിനികൾ, ബോംബറുകൾ എന്നിവ ആധുനികവൽക്കരിക്കുന്നു. റഷ്യ ആണവായുധ ഉപയോഗത്തിന്റെ പരിധി കുറച്ചതായി റിപ്പോർട്ട്.

അസ്ഥിര ലോകവും ആണവ ഭീഷണിയും

പരമ്പരാഗത സംഘർഷങ്ങൾ രൂക്ഷമാകുന്ന പശ്ചാത്തലത്തിലാണ് ഈ മാറ്റങ്ങൾ. 2024-ൽ സംഘർഷങ്ങളിലെ മരണസംഖ്യ 2.39 ലക്ഷമായി ഉയർന്നു. ​ഗസ്സ, ഉക്രെയ്ൻ, മ്യാൻമർ, സുഡാൻ, എത്യോപ്യ എന്നിവിടങ്ങളിലെ യുദ്ധങ്ങൾ ലോകത്തെ ഞെട്ടിച്ചു.

ലോക സൈനിക ചിലവ് കഴിഞ്ഞ ദശകത്തിൽ 37% വർധിച്ച് 2024-ൽ 2.7 ട്രില്യൺ ഡോളറിലെത്തി. ആണവായുധങ്ങളുടെ ശക്തിയും കൃത്യതയും വർധിക്കുന്നത് ലോകത്തെ കൂടുതൽ അപകടകരമാക്കുന്നുവെന്ന് വിദഗ്ധർ മുന്നറിയിപ്പ് നൽകുന്നു.

ആണവ ചർച്ച ഉയരുന്നു

യൂറോപ്പിൽ ‘നോർഡിക് ബോംബ്’ പോലുള്ള ആശയങ്ങൾ ചർച്ചയാകുന്നു. സ്വീഡനും ഫിൻലൻഡും യുഎസുമായി സൈനിക കരാറുകൾ ഒപ്പിട്ട് ആണവായുധ വിന്യാസത്തിന് വഴിയൊരുക്കുന്നു. പോളണ്ട് യുഎസിന്റെ ആണവായുധ പങ്കിടലിന് താൽപര്യം പ്രകടിപ്പിച്ചു. യുഎസിന്റെ സുരക്ഷാ ഗ്യാരണ്ടി ദുർബലമായിരിക്കുന്നു. ഇത് പുതിയ യാഥാർത്ഥ്യമാണ്,” ഡാൻ സ്മിത്ത് വ്യക്തമാക്കി.

നിയന്ത്രണ ശ്രമങ്ങൾ

ലോകത്തെ 193 യുഎൻ അംഗരാജ്യങ്ങളിൽ 178 എണ്ണം സമഗ്ര ആണവ പരീക്ഷണ നിരോധന ഉടമ്പടി (CTBT) അംഗീകരിച്ചു. ആണവായുധ നിരോധന ഉടമ്പടി (TPNW) 73 രാജ്യങ്ങൾ അംഗീകരിച്ചു. “ആർക്കും ആണവയുദ്ധത്തിൽ ജയിക്കാനാകില്ല,” സ്മിത്ത് ഓർമിപ്പിക്കുന്നു. “ഇസ്റഈൽ പോലുള്ള രാജ്യങ്ങൾ ഗുരുതര ഭീഷണിയിൽ ആണവായുധം ഉപയോഗിച്ചേക്കാം, പക്ഷേ അത് പ്രതികാരം മാത്രമായിരിക്കും.”ലോകം സമാധാനത്തിന്റെ പാത തേടേണ്ട ഈ നിർണായക വേളയിൽ, SIPRI റിപ്പോർട്ട് മനുഷ്യരാശിക്ക് ഒരു മുന്നറിയിപ്പാണ്. നിയന്ത്രണവും സഹകരണവും ഇല്ലാതെ, ആണവ ഭീഷണി വളർന്നുകൊണ്ടിരിക്കും.